Минатата година, шест македонски организации залудно се обидоа да се регистрираат и добија вкупно најмалку 19 одбивања. Две од нив, кои добија случаи во Европскиот суд за човекови права (ЕСЧП), добија по 5 одбивања: Друштвото на репресирани Македонци во Бугарија – жртви на комунистичкиот терор и ОМО „Илинден“. Другите четири се: Здружението за заштита на основните индивидуални права, чија регистрација беше отповикана (2), Македонскиот културен клуб „Никола Вапцаров“ (2), Обединетата Македонска Организација „Илинден“ – Пловдив (4) и Обединетата Македонска Организација „Илинден“ – Благоевград (1), се наведува во извештајот на Европската слободна алијанса за положбата на македонското малцинство во Бугарија, за 2024 година.
Бугарските судови продолжуваат да одбиваат регистрација на македонски организации со истите мотиви и методи, за кои постојано се осудуваат од ЕСЧП и Комитетот на министри при Советот на Европа.
Одбивањата на бугарските судови за спроведување на пресудите на ЕСЧП и регистрација на македонските здруженија, секогаш се засноваат на „вечниот“ изговор – непостоење на малцинството. Официјалната политика и институциите во Бугарија не отстапуваат од тврдењето дека нема македонско малцинство во Бугарија и затоа нема причина за постоење на такви организации.
„Врз основа на претходното тврдење, работата во одбрана на македонската самосвест и традиции се толкува како намера за наметнување на туѓа етничка свест меѓу бугарското население. Работата во одбрана на македонската самосвест и традиции понекогаш се толкува како цел за создавање поделба и спротивставување на етничка основа. Целите на организациите да работат во одбрана на македонското малцинство се толкуваат како обид за создавање привилегии на етничка основа или обратно – за кршење на правата на другите граѓани. Секое споменување на македонското малцинство, етничка припадност или самосвест се третира како неуставно, насочено против единството на нацијата и територијалниот интегритет на земјата. Судиите, надминувајќи ги своите законски овластувања, ја преземаат улогата на ‘арбитри на историјата’ и ја проценуваат релевантноста и валидноста на историските датуми и настани што кандидатите требало да ги слават, како и нивната поврзаност со одредена етничка група или нејзината историја“, се вели во извештајот на ЕФА.
Целиот текст прочитајте го на МКД.мк
