На денешната 51. седница на Собранието, пред пратениците се најде Годишниот извештај за работата на Судскиот совет на Република Северна Македонија за 2024 година.
Во извештајот се наведува дека Советот во текот на 2024 година одржал 39 седници, на кои биле донесени одлуки за избор и разрешување на судии, претседатели на судови и судии поротници, утврдување на нестручно или несовесно вршење на функцијата, разгледување извештаи за работата на судовите, времено упатување на судии и други активности согласно законските надлежности.
Советот почна со имплементација на краткорочните препораки од Извештајот на оценската мисија на ЕУ, кои се опфатени со усвоениот Акциски план. Во 2025 година, приоритет останува реализацијата на препораките за унапредување на постапките за избор и одговорност на судиите и членовите на Советот, како и зголемување на транспарентноста и управувањето со ресурсите.
Судскиот совет истакнува дека ќе продолжи со следење на состојбите во судството, постапување по случаи со можни коруптивни дејствија и примена на Програмата за превенција на корупцијата 2022–2025. Меѓу клучните заложби е и зголемување на буџетот за судската власт од сегашните 0,3% на законски предвидените 0,8% од БДП.
На истата седница, пред пратениците се најдоа и неколку законски предлози, меѓу кои и за ратификација на Договорот за ЦЕЕПУС IV, претворање на побарувања кон странски кредитори во влог во НОМАГАС, како и измени на закони за невработеност, приватни агенции за вработување и јавно здравје.
