Свет

Откако Украина ја изведе операцијата “Пајажина”, Русија воведе вонредни безбедносни мерки на Крим

Русија воведе вонредни мерки на Крим по масовен напад со украински дронови

По најмасовниот воздушен напад досега врз руски воени бази, што се случи изминатиот викенд, руските сили драстично ја зголемија безбедноста на окупираниот Крим.

Според податоци објавени од украинската партизанска мрежа АТЕШ на платформата Телеграм, руската противвоздушна одбрана сега непрекинато патролира околу клучните воени аеродроми на полуостровот, вклучувајќи ги оние во Саки, Џанкој и Гвардискоје. Војниците, според извештаите, се жалат на физичка и психолошка исцрпеност поради недостиг на персонал и засилените безбедносни обврски. Дополнително, контролите на административната граница меѓу Крим и Херсонската област се значително заострени.

Уништен или оштетен значителен дел од руската бомбардерска флота

Да потсетиме, ноќта меѓу 1 и 2 јуни, Украина ја изведе една од најкомплексните и најмасовни беспилотни операции досега, насочена длабоко во руска територија. Нападот, според украински извори, вклучувал 117 дронови и целел на четири воени воздушни бази – од источен Сибир до западните граници на Руската Федерација.

Сателитски снимки покажуваат дека во нападот биле уништени или тешко оштетени најмалку 13 руски стратешки бомбардери, меѓу кои и модели Tu-95MS и Tu-22M3. Според проценките, вкупната материјална штета изнесува околу 6 милијарди евра.

Украинската безбедносна служба (СБУ) ја подготвувала операцијата повеќе од 18 месеци. Дроновите биле тајно внесувани на руска територија скриени во дрвени мобилни конструкции транспортирани со камиони.

Нападите предизвикале големи пожари и разурнувања на воздушните бази во Иркутската и Мурманската област. Руското Министерство за одбрана потврди дека претрпеле штета и информираше дека некои од извршителите биле приведени.

Претседателот на Украина, Володимир Зеленски, ја нарече операцијата „блескава“ и историска, нагласувајќи дека со неа е уништена или онеспособена речиси третина од руската стратешка бомбардерска флота.

Воените сили на Крим на работ на издржливоста

АТЕШ известува дека руските сили на Крим сега функционираат под режим на 24-часовни стражи, со засилени патроли околу сите витални воени објекти. Внатрешно, војниците се соочуваат со премореност и недостаток од кадар, што дополнително ја комплицира безбедносната состојба.

Истовремено, руските власти вовеле нови рестрикции за движење на товарни возила преку административната граница кон Херсонската област, што сериозно ја нарушува логистичката поддршка на војската во тој регион.

Движењето АТЕШ, составено од украински и кримско-татарски партизани, редовно објавува информации за диверзии и саботажи на териториите под руска окупација.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.