Пад на владата во Холандија: Ултрадесничарот Герт Вилдерс ја повлече својата партија од коалицијата
Кревката коалициска влада во Холандија доживеа колапс откако лидерот на крајната десница, Герт Вилдерс, ја повлече својата Партија за слобода (PVV) од владејачката структура поради несогласувања околу миграциската политика.
Владата предводена од премиерот Дик Шофер падна во вторникот, откако Вилдерс соопшти дека се повлекува од коалицијата поради, како што наведе, неможноста да се постигне согласност за воведување на „најрестриктивната имиграциска политика досега“, која била договорена со коалиционите партнери по изборната победа во ноември 2023 година.
„Нема потпис за нашите планови за азил… PVV ја напушта коалицијата“, напиша Вилдерс на социјалната мрежа Икс (поранешен Твитер).
Тој додаде дека го известил премиерот Шофер дека сите министри од неговата партија ќе ја напуштат владата.
Владината криза пред самитот на НАТО
Колапсот на владата доаѓа само неколку недели пред Холандија да биде домаќин на самитот на лидерите на НАТО – настан од голема меѓународна важност за земјата.
Вилдерс, кој со години води кампања против имиграцијата, уште кон крајот на мај најави дека ќе ја напушти владината коалиција доколку неговиот план од десет точки за ограничување на имиграцијата не биде спроведен во краток рок.
Планот вклучуваше затворање на границите за барателите на азил, засилена гранична контрола и депортација на осудени државјани со двојно државјанство. „Затворање на границите за баратели на азил и забрана за спојување на семејства. Нема отворање нови азилантски центри – напротив, тие треба да се затворат“, поентираше Вилдерс.
Контроверзии и правни предизвици
Иако неговиот план беше поддржан од дел од гласачкото тело, повеќето политички аналитичари и експерти за човекови права оценуваат дека предложените мерки се правно спорни, тешко применливи, па дури и спротивни на меѓународното право.
Некои аналитичари дури сметаат дека Вилдерс намерно ја предизвикал кризата за да ја урне владата, отворајќи можност за нови избори во кои би се обидел да добие посилен мандат и поширока поддршка за својата антиимиграциона агенда.
