Арнолд Шварценегер повторно ја облекува шпионската униформа во втората сезона од акционата серија FUBAR, која на 12 јуни пристигнува на Netflix. По успешната прва сезона, фановите ќе добијат нова доза од семејни тајни, експлозивни мисии и многу хумор.
Во новите епизоди, Лук (Шварценегер) и неговата ќерка Ема (Моника Барбаро), кои сега знаат еден за друг дека се тајни агенти, се впуштаат во уште поопасна авантура. Минатото на Лук се враќа да го прогонува во ликот на новиот лик што го игра Кери-Ан Мос – германска терористка со лична освета и можеби нереализирана љубов од младоста.
Односот меѓу Лук и оваа нова антихероина носи и хумористичен и драматичен тон, со Арни кој повторно брилира во сцените на избегнување, заводливи игри и опасни мисии. Во меѓувреме, Ема го привлекува вниманието на британски агент од MI6, што дополнително го усложнува нивниот професионален и семеен живот.
Интересот за серијата е зголемен и поради подемот на Барбаро, која меѓу првата и втората сезона стана Оскар-номинирана за улогата во A Complete Unknown. Нејзиниот настап во Top Gun: Maverick ѝ го отвори патот до поширока публика, а FUBAR 2 може да биде нејзин нов голем хит.
Сите епизоди ќе бидат достапни веднаш по премиерата – стратегија по која Netflix останува препознатлив. Љубителите на лесна акција, семејни тајни и комични сцени во стилот на Шварценегер имаат уште една причина да останат дома на 12 јуни.
