Собранието добива безбедносна зона – се укинува градбата на катната гаража до Домот на АРМ
Собранието на Северна Македонија е во финална фаза на изгласување на Предлог-закон со кој просторот од 1,5 хектари до Домот на АРМ се прогласува за безбедносна зона. Со новиот закон се забрануваат градежни активности, јавни собири, протести и манифестации на оваа локација, а се забранува и прелет со дронови до висина од 100 метри.
Просторот, продаден на фирмата „Анго“ ДООЕЛ во 2013 година за изградба на катна гаража, ќе се врати во државна сопственост. Законот пропишува автоматско раскинување на договорот, укинување на одобрението за градба и враќање на уплатените средства, вклучувајќи вложени трошоци.
Катната гаража, за која инвеститорот започна активности во 2024 година по добиена судска разрешница, беше дозволена со измена на ДУП „Мал ринг“ во 2013 година. Градоначалникот на Центар ја поништи дозволата во 2018, но Управниот суд ја врати на сила.
Законот ќе ја обврзе Агенцијата за катастар да ја прибележи зоната во јавната книга, а урбанистичките планови во таа зона автоматски престануваат да важат.
