Бројот на новородени во Јапонија во 2024 година се намалил под 700.000 – за првпат во историјата на земјата – покажуваат податоците на јапонското Министерство за здравство, труд и социјална политика.
Според официјалната статистика, лани во земјата се родиле 686.061 деца, што претставува пад од 5,7 отсто во споредба со 2023 година, објави новинската агенција „Кјодо“.
Стапката на фертилитет – просечниот број деца што една жена ги раѓа во текот на својот живот – паднала на рекордно ниски 1,15, наспроти 1,20 во претходната година.
И бројот на раѓања и фертилитетот опаѓаат деветта година по ред, а стапката на наталитет веќе 15 години заостанува зад официјалните демографски проекции.
Податоците не ги вклучуваат децата родени од странски државјани кои живеат во Јапонија.
Истовремено, регистриран е и рекорден број починати – дури 1.605.298 – што доведе до најголем природен пад на населението во Јапонија од Втората светска војна досега. Ова е 18-та последователна година со природен пад на популацијата.
Сепак, бројот на склучени бракови бележи благ пораст за првпат по две години – лани биле склучени 485.063 бракови, што е за 10.322 повеќе отколку во 2023 година.
Бројот на новородени во Јапонија паднал под еден милион уште во 2016 година, а под 800.000 во 2022 година.
Според претходните прогнози на Националниот институт за население и социјална сигурност, бројот на раѓања требаше да падне под 690.000 дури во 2039 година – што значи дека трендовите на наталитетот се влошуваат многу побрзо од очекуваното.
Најниска стапка на фертилитет во 2024 година е забележана во Токио – само 0,96. По него следуваат префектурите Мијаги со 1,00 и Хокаидо со 1,01, додека највисока стапка има Окинава со 1,54, пред Фукуи со 1,46.
