Економија

Диме Петроски на чело на Македонската асоцијација за рударство – нова визија за одржлив развој на секторот

На вонредна седница одржана на 29 мај, Македонската асоцијација за рударство (МАР) избра ново раководство, при што за претседател на Асоцијацијата е избран Диме Петроски, дипломиран инженер геолог со повеќе од 23 години професионално искуство во рударството и геотехниката.

Кариерата на Петроски започнува во 1998 година како теренски инженер, а неговиот професионален развој вклучува водење на значајни проекти за истражување, развој и стабилизација на инфраструктурни објекти, хидрогеолошки истраги и инженерскогеолошки активности. Работел на проекти за домашни компании како ЕСМ и ЕЛЕМ, но и за интернационални партнери како Strabag Austria, како и компании од Велика Британија, Австралија, САД и Турција.

Во моментов, Петроски ја извршува функцијата директор за продажба во Градежен Институт Македонија АД Скопје, каде со своето лидерство и експертиза активно придонесува во бројни проекти во рударството и градежништвото.

По неговиот избор, Петроски изјави дека ќе се залага за модернизација на рударскиот сектор, јакнење на капацитетите на Асоцијацијата и градење силна соработка со сите засегнати страни.

„Моја заложба е да ја вратам Македонската асоцијација за рударство на местото кое ѝ припаѓа – како репрезентативен глас и столб на рударскиот сектор, кој е значаен двигател на економскиот развој на државата“, изјави тој, додавајќи дека ќе се залага за технолошки напредок, унапредени еколошки стандарди и рамноправно учество на сите членки во процесите на одлучување.

Од МАР изразуваат уверување дека новото раководство ќе придонесе за отворање на ново поглавје во стабилен и одговорен развој на рударскиот сектор во земјата.

Економија

Димитриеска – Кочоска: 97 милиони евра за клучни енергетски проекти

Денеска беа потпишани договори за државна гаранција и заеми во вкупна вредност од 97 милиони евра, со кои ќе се реализираат стратешки енергетски проекти што значително ќе ја променат енергетската слика на државата.

Министерството за финансии, преку издавање државна гаранција, овозможи финансирање од 87 милиони евра за проектот „Фотонапонска електроцентрала Битола 3“. Од оваа сума, 50 милиони евра се обезбедени од КфВ, а 37 милиони евра од Европската банка за обнова и развој. Дополнително, обезбедени се и 10 милиони евра за ревитализација на хидроелектраните.

Министерката за финансии Гордана Димитриеска – Кочоска изрази благодарност до меѓународните финансиски институции за континуираната поддршка, како и до тимот на АД ЕСМ за нивната посветеност во реализацијата на проектите.

Според неа, овие капитални инвестиции ќе придонесат за зајакнување на домашното производство на електрична енергија, ќе обезбедат посигурно и постабилно снабдување и ќе дадат силен поттик за економска стабилност и одржлив развој на државата.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.

Економија

Нови цени на горивата од полноќ

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 1,18% во однос на одлуката од 19.12.2025 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,00 ден/лит.

Малопродажната цена на ЕУРОДИЗЕЛ (Д-Е V) не се менува.

Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит.

Малопродажната цена на Мазутот М-1 НС се намалува за 0,028 ден/кг и сега ќе изнесува 32,607 ден/кг.

Од 23.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 70,00 (денари/литар)

Моторен бензин ЕУРОСУПЕР БС – 98 72,00 (денари/литар)

Дизел гориво ЕУРОДИЗЕЛ БС (Д-Е V) 64,50 (денари/литар)

Масло за горење Екстра лесно 1 (ЕЛ-1) 63,50 (денари/литар)

Мазут М-1 НС 32,607 (денари/килограм)