По масовните украински напади со дронови врз руски аеродроми и саботажата на Кримскиот мост, Москва молчи. Украинската операција „Пајажинеста мрежа“, во која беа уништени или тешко оштетени над 40 руски стратешки бомбардери, како и експлозијата под симболот на руската анексија – Кримскиот мост, се најмасовниот удар на украинските сили врз руска територија од почетокот на војната.
Кремљ, сепак, реагира со задоцнето и протоколарно соопштение. Портпаролот Песков изјави дека „инцидентот се истражува“, а Путин само бил „информиран преку интернет“. Ваквиот слаб одговор, во контраст со големиот удар врз руската воена моќ, предизвика жестоки критики од пронатовските блогери и руската пропагандна машинерија, која бара „освета“ и „нуклеарен одговор“.
Руските пропагандисти, како Владимир Соловјов и Маргарита Симоњан, повикаа на напади врз Украина и дури и врз инфраструктура во земји членки на НАТО. Од друга страна, дел од влијателните проруски блогери предупредија дека Кремљ мора да излезе со сериозна стратегија и признаа дека украинските сили ја водат војната интелигентно и смело.
Се поставува прашањето – дали тишината од Путин е знак на неподготвеност или стратегија? Дали Русија планира голема одмазда или се наоѓа во состојба на збунетост и дефанзива? Аналитичарите не ја исклучуваат можноста Кремљ да подготвува пообемен и неочекуван одговор, можеби надвор од украинското бојно поле.
Сепак, штетата од последната украинска операција е веќе направена. Разорени стратешки бомбардери, уривање на „неприкосновениот“ Кримски мост и целосна изложеност на руската ранливост на внатрешна територија – се удари што можат да имаат долгорочни последици. Ако Путин подготвува одговор, тој ќе мора да биде убедлив. Инаку, молкот може да се претвори во симбол на слабост.
