Евакуација во Келн: Пронајдени три неексплодирани бомби од Втората светска војна
Околу 20.000 жители на германскиот град Келн беа евакуирани откако во средата беа откриени три неексплодирани бомби од Втората светска војна, што предизвика една од најголемите операции од овој тип во Германија во последниве децении.
Голем дел од центарот на градот беше затворен додека стручни тимови се подготвуваа за неутрализирање на експлозивните направи. Станува збор за американски бомби, кои цели 80 години останале незабележани – две тешки по 90 килограми и една од 45 килограми. Поради нивната големина и потенцијалната опасност, беше воспоставена безбедносна зона со радиус од 1.000 метри.
Бомбите беа откриени уште во понеделник во округот Дојц, во централното градско подрачје на Келн. Зоната за евакуација ги опфати целиот стар дел на градот, 58 хотели, три моста, градската општина, главната железничка станица, неколку музеи, една болница и два дома за стари лица.
Дури и германската телевизиска куќа RTL беше принудена да ја прекине својата програма и да ја евакуира зградата во текот на утринските часови. Еден од водителите ѝ се обрати на публиката со зборовите: „Извинете ако делуваме забрзано – веќе сме тргнати“, пред емисијата Punkt 8 да биде прекината во живо.
Градските власти одеа од врата до врата за да се осигурат дека сите објекти се испразнети. За погодените граѓани беа отворени два центри за прифаќање, а спортски сали и цркви надвор од центарот беа адаптирани за да им пружат поддршка на евакуираните.
Сообраќајот во градот беше сериозно нарушен – три моста беа затворени, додека железничкиот и автобускиот превоз беа привремено прекинати.
Иако не е јасно кога жителите ќе можат да се вратат во своите домови, властите се надеваат дека специјализираните тимови ќе успеат да ги деактивираат бомбите до крајот на денот.
Се верува дека ова е најголемата операција за деактивирање бомби во Германија по крајот на Втората светска војна. За време на војната врз Келн биле фрлени најмалку 1,5 милион бомби, а се проценува дека околу 20% од нив не експлодирале целосно. Поради тоа, под улиците на градот и денес се кријат неексплодирани направи, што низ годините довело до повеќекратни евакуации.
Само во текот на 2024 година, во Келн се откриени 31 неексплодирана бомба, што резултираше со 17 евакуации.
