Физичка пресметка меѓу пратениците Кончо Ганев и Јавор Бојанков го одбележа денешниот хаос во бугарското Народно собрание, откако беше објавен извештајот со позитивна оценка за пристапувањето на Бугарија во еврозоната. Протестната група во парламентот најави дека нема да дозволи ниту еден пратеник да говори, а тензиите кулминираа веднаш по изјавата на лидерот на „Преродба“, Костадин Костадинов.
„Ова е црн ден за Бугарија. Јаничарите ја закопуваат нашата земја“, изјави Костадинов од говорницата, пренесе агенцијата Ројтерс. Тој ја обвини владејачката коалиција за национално предавство и ги повика сите политички лидери да излезат пред демонстрантите кои се собраа пред зградата на Бугарската народна банка.
И покрај блокадата и напнатата атмосфера, пратениците успеаја да изгласаат неколку предлог-закони, по што седницата беше затворена. Во меѓувреме, центарот на Софија беше парализиран од голем протест против воведувањето на еврото. Демонстрантите побараа референдум и изразија поддршка за задржување на националната валута – бугарскиот лев.
Противниците на еврозоната предупредуваат дека преминот кон еврото ќе значи губење на финансискиот суверенитет, додека владата уверува дека тоа е чекор кон поголема стабилност и економска интеграција во ЕУ.
Видеото може да го погледнете тука
