Премиерот на Монголија, Ојун-Ердене Лувсаннамсраи, поднесе оставка откако не успеа да обезбеди доволна поддршка при гласањето за доверба во парламентот, јавуваат монголските медиуми.
Оставката ја потврди и Амбасадата на Монголија во Вашингтон, а според информациите на порталот ikon.mn, за Лувсаннамсраи гласале само 44 пратеници, значително под потребниот минимум од 64 гласа.
Гласањето се одржа во раните утрински часови во вторникот, по неколку недели јавен притисок и протести предизвикани од медиумски објави за расипничкиот начин на живот на синот на премиерот. Дел од демонстрантите отворено бараа негова оставка, сметајќи дека скандалот ја поткопува довербата во власта.
Во пресрет на гласањето, Лувсаннамсраи предупреди дека неговото можно симнување од функцијата може да предизвика политичка нестабилност и да ја загрози, како што рече, „кревката демократија“ на Монголија.
Контроверзијата избувна откако на социјалните мрежи се појавија фотографии на кои наводно се гледа синот на премиерот со неговата свршеница со скапа „Диор“ чанта и торби од луксузни брендови за време на нивниот свршенички одмор.
Јавноста гласно се запраша како семејството на премиерот може да си дозволи таков начин на живот, а медиумите пренесуваат дека антикорупциските органи на земјата веќе започнале истрага за финансиската состојба на семејството.
