Балкан

Возач на српската армија осуден на 12 години затвор: Пијан преминал во спротивна лента и усмртил цело семејство кај Рашка

Припадник на Војската на Србија, М.В. од Ниш, е осуден на 12 години затвор од Вишиот суд во Краљево, поради предизвикување тешка сообраќајна несреќа во која загинаа четири лица, меѓу кои и три малолетни деца.

Несреќата се случила на 21 септември на патниот правец Краљево – Рашка, кога осудениот управувал со воено возило од типот „ПАСАРС“ под дејство на алкохол. Тој изгубил контрола, преминал во спротивната сообраќајна лента и се судрил со патнички автомобил во кој се наоѓале Данијел Лазовиќ, неговите три деца на возраст од 10, 7 и една година, како и нивната сосетка Дијана. Сите четворица починале на лице место.

Информацијата за изречената пресуда ја потврди адвокатот Оливер Мадиќ, застапник на единствената преживеана од несреќата – Миријана Лазовиќ, сопруга и мајка на загинатите.

„Главното рочиште се одржа на 2 јуни, а пресудата беше објавена вчера. М.В. е осуден на 12 години затвор бидејќи, управувајќи возило под дејство на алкохол, премина во спротивната коловозна лента и директно се судри со возилото на семејството Лазовиќ“, изјави Мадиќ.

Трагедијата ја потресе јавноста во Србија, а случајот повторно ја отвори дебатата за безбедноста во сообраќајот и одговорноста на службените лица при управување со воени возила.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.