Европската ракометна федерација (ЕХФ) денеска ја донесе официјалната одлука во врска со неодиграниот реванш од финалето на Европскиот куп. Македонскиот клуб Алкалоид го доби мечот со службен резултат 10-0, откако грчкиот тим АЕК не се појави на теренот во Скопје, и со тоа со две победи – вклучувајќи ја и онаа во Атина – го освои престижниот европски трофеј.
Во своето соопштение, ЕХФ појасни дека „Ракометниот суд на ЕХФ ја донесе својата прва одлука во врска со случајот отворен откако беше откажан реваншот од финалето на Европскиот куп за мажи на ЕХФ за сезоната 2024/25 помеѓу РК Алкалоид и РК АЕК Атина, првично закажан за 25 мај 2025 година во Скопјe. Ракометниот суд утврди дека АЕК бил должен да игра на закажаниот натпревар. Со одбивањето да го стори тоа, клубот ги прекршил релевантните прописи на ЕХФ и затоа е одговорен“.
Понатаму, во соопштението се наведува:
„Судот одлучи на следниов начин: Резултатот од реваншот од финалниот натпревар на Европскиот куп за мажи на ЕХФ за сезоната 2024/25, меѓу РК Алкалоид и РК АЕК Атина, се регистрира со 10-0 за РК Алкалоид. Првиот натпревар заврши со победа на РК Алкaloид од 25-29. РК Алкалоид е затоа победник на Европскиот куп за мажи на ЕХФ за сезоната 2024/25, вклучувајќи ги сите последици и предности што произлегуваат од оваа титула. Секоја жалба против овие одлуки нема да има суспензивно дејство. Одлуката што се разгледува само ги опфаќа аспектите на случајот поврзани со натпреварувањето. Посебни дисциплински постапки во врска со одбивањето да се игра натпреварот, поврзаните штети и распределбата на билетите сè уште се во тек. РК АЕК Атина може да поднесе жалба до Апелациониот суд на ЕХФ во рок од седум (7) дена.“
Со оваа одлука, РК Алкалоид го запишува својот најголем успех на европската сцена и ја заокружува историската сезона со титула која ќе остане запаметена.
