Повеќе од 15 граѓански организации и еколошки иницијативи поднесоа формална претставка до Владата со барање за итно донесување на закон за повторно прогласување на Националниот парк „Маврово“, со цел обезбедување соодветна заштита и управување согласно националното законодавство и меѓународните стандарди.
Организациите изразуваат сериозна загриженост поради, како што велат, децениската институционална стагнација во трансформацијата на паркот. Според нив, моменталниот правен вакум ја загрозува заштитата на ова значајно природно подрачје и ја ограничува можноста локалните заедници да развиваат одржливи економски активности.
„Постојат меѓународни донатори кои се подготвени да инвестираат во зачувување и функционирање на паркот, но нивната поддршка е условена со донесување и спроведување на План за управување“, предупредуваат од организацијата „Еко-свест“. Тие додаваат дека отсуството на планот го оневозможува долгорочното финансирање и го загрозува еден од најстарите национални паркови во Европа.
Во претставката се посочува дека досега не е донесен ниту Законот за репрогласување на паркот, ниту Планот за управување, а притоа се бележат бројни нерегуларности и нелегални активности на терен – кои, и покрај тоа, остануваат несанкционирани.
Организациите укажуваат и на алармантна зависност на јавната установа „Национален парк Маврово“ од комерцијална сеча, која, според нивните податоци, обезбедува околу 80% од приходите, при што се бележи и значителен пад на популацијата на заштитени животински видови.
Во поднесокот се повикуваат и на препораките на Комитетот на Бернската конвенција, кој повеќепати побара итно репрогласување на паркот. Игнорирањето на овие препораки, велат тие, претставува директно кршење на обврските што Македонија ги има преземено согласно меѓународното право.
