Отворениот конфликт помеѓу американскиот претседател Доналд Трамп и бизнисменот Илон Маск доби нова димензија откако Маск, преку објава на мрежата Х, директно го обвини Трамп дека се наоѓа во досието на Џефри Епштајн.
„Време е да ја фрлиме вистинската бомба: Доналд Трамп е во документите на Епштајн. Тоа е вистинската причина зошто не се објавени. Убав ден, DJT!“, напиша Маск, наговестувајќи дека објавата ќе добие потврда во иднина и дека „вистината ќе излезе на виделина“.
Оваа изјава доаѓа по серијата меѓусебни напади меѓу двајцата, кои до неодамна беа блиски соработници. Конфликтот започна откако Маск остро го критикуваше новиот „голем, убав закон“ за даноци и буџет на администрацијата на Трамп, нарекувајќи го „одвратна грдотија“. Трамп, пак, изјави дека е „многу разочаран“ и дека Маск „многу му должи“.
Маск возврати дека законот никогаш не му бил презентиран и дека бил изгласан „набрзина, сред ноќ, без можност Конгресот да го прочита“. Како реакција, Трамп му се закани со укинување на државните субвенции за неговите компании.
Преку оваа последна објава, Маск очигледно игра на карта што може да предизвика политички и правни потреси – алудирајќи дека постои обид за прикривање на евентуална вмешаност на Трамп во аферата со Епштајн. Дел од документите од оваа истрага досега се објавени, но не се потврдени наводи за незаконито однесување од страна на Трамп. Сепак, инсинуациите на Маск отворија нова и драматична фаза во нивниот јавен судир.
