Авион на „Рајанер“ итно слета во Германија поради силна турбуленција – повредени девет патници
Авион на нискобуџетната авиокомпанија „Рајанер“, кој летал од Берлин кон Милано, синоќа изврши итно слетување во Меминген, јужна Германија, поради силна турбуленција предизвикана од невреме. Девет патници се повредени, соопшти баварската полиција.
Според нивните информации, пилотот бил принуден да го пренасочи летот кон Меминген, град кој се наоѓа околу 113 километри западно од Минхен, поради опасни временски услови. Иако авионот безбедно слетал, турбуленцијата предизвикала повреди кај девет лица, на возраст од две до 59 години.
Една жена се здобила со повреда на главата, нејзиното две и полгодишно дете имало модринки, а 59-годишна патничка пријавила болки во грбот. Тројцата биле пренесени во болница, додека останатите патници со полесни повреди биле згрижени на лице место.
Поради неможност летот да продолжи од Меминген – бидејќи локалните воздухопловни власти не издале дозвола – авиокомпанијата организирала автобуски превоз за патниците до Милано.
Патниците опишале сцени на паника и страв за време на инцидентот.
„Никогаш не сум почувствувал таков страв. Во тој момент помислив дека авионот ќе се распадне!“, изјавил еден од патниците за германскиот „Билд“.
Според истиот извор, дел од патниците не биле врзани со безбедносен појас во моментот на турбуленцијата, а членови на екипажот не давале континуирани инструкции за време на кризата.
