Руските воени авиони биле оштетени, но не и уништени во украинскиот напад од 1 јуни, соопшти заменик-министерот за надворешни работи на Русија, Сергеј Рјабков. Тој изјави дека оштетените летала ќе бидат поправени.
Цел на украинските удари биле неколку воени аеродроми во Сибир и на далечниот север на Русија – стратешки локации каде Москва чува дел од својата флота на тешки бомбардери, вклучително и оние кои се дел од нуклеарниот арсенал на земјата.
Според проценките на американските разузнавачки служби, во нападот биле погодени до 20 авиони, од кои околу 10 биле целосно уништени, пренесува Ројтерс, повикувајќи се на двајца американски официјални претставници. Оваа бројка е значително пониска од тврдењата на украинскиот претседател Володимир Зеленски, кој претходно изјави дека уништени се 20 авиони.
Рјабков, кој е задолжен за контролата на вооружувањето во рамки на руската дипломатија, за државната новинска агенција ТАСС изјави: „Како што беше истакнато од страна на Министерството за одбрана, погодената опрема не е уништена, туку оштетена. Таа ќе биде обновена.“
Сепак, не е јасно колку време ќе биде потребно за Русија да ги поправи или замени оштетените авиони, имајќи ја предвид нивната технолошка комплексност, староста на некои модели од советската ера и ограничувањата од западните санкции кои го попречуваат увозот на чувствителни компоненти.
Анализи на комерцијални сателитски снимки по нападот, според експерти, потврдуваат оштетувања на бомбардери од типот Ту-95 и Ту-22 – авиони кои Русија ги користеше за лансирање ракети врз цели во Украина.
Според податоци од Билтенот на атомски научници, Русија располага со околу 67 стратешки бомбардери, од кои 52 се Ту-95 (познати како „Мечка-Х“ по НАТО класификацијата), а 15 се Ту-160 („Блекџек“). Се проценува дека 58 од нив се во активна служба.
Покрај нив, Русија поседува и 289 нестратешки борбени авиони и бомбардери, вклучувајќи ги Ту-22, Су-24, Су-34 и МиГ-31.
Руските власти досега не објавија кои конкретни авиони биле погодени, но потврдија дека мета на нападите биле пет воени бази.
