Американскиот претседател Доналд Трамп приватно го пофалил неодамнешниот напад на Украина со дронови врз руските воздушни бази, оценувајќи го како „моќен“ и „кул“, иако е загрижен дека тоа може да ја отежне неговата дипломатска мисија за примирје, објави „Аксиос“.
Според извори блиски до Трамп, тој бил импресиониран од прецизноста и далечинското изведување на нападот, но воедно предупредил дека Владимир Путин би можел остро да возврати. Трамп признал дека нападот би можел да ја попречи неговата иницијатива за ставање крај на војната.
„Сакаме оваа војна да заврши. Сакаме деескалација. Ако Путин полуди како одговор, тоа е реална загриженост“, рекол еден од неговите соработници.
Рускиот претседател веќе изјави дека нападите го доведуваат под сомнеж секој можен мировен состанок со украинскиот претседател Зеленски, кој пак возврати дека Русија и пред тоа избегнувала какво било примирје.
Цел на украинскиот напад биле бомбардери со долг дострел – дел од нуклеарниот арсенал на Русија – што дополнително ги зголемило тензиите.
И покрај загриженоста, Трамп останал импресиониран од способноста на Украинците да нанесат удар „како чивава што напаѓа многу поголемо куче“, како што изјавил еден од неговите советници.
