Портпаролката на руското Министерство за надворешни работи, Марија Захарова, изјави дека Москва внимателно ги следи изјавите на српскиот претседател Александар Вучиќ, по обелоденувањето на наводни податоци од Руската служба за надворешно разузнавање (СВР) дека оружје од српско производство завршува во Украина, и покрај официјалната политика на неутралност.
„И покрај ‘неутралноста’ што ја декларираат српските власти, српски воени компании продолжуваат да снабдуваат муниција за Украина. За тоа се користи шема со лажни сертификати за крајни корисници и посреднички земји – најчесто членки на НАТО како Чешка, Полска и Бугарија“, наведоа претходно руските разузнавачки служби.
Српскиот претседател Вучиќ, реагирајќи на обвинувањата, изјави дека веќе разговарал на таа тема со рускиот претседател Владимир Путин и дека е формирана комисија за проверка на наводите, особено во однос на злоупотреба на сертификатите за крајни корисници.
„Ги забележавме јавно изразените уверувања на шефот на српската држава дека ќе биде извршена ревизија на воено-техничката соработка на Белград со странски партнери, со цел навремено да се идентификуваат и прекинат сомнителни извозни трансакции. Очекуваме дека со овие мерки ќе се спречи испорака на оружје на несоодветни дестинации,“ изјави Захарова.
Таа додаде дека Русија е уверена во свесноста на Србија за, како што рече, „ризиците од паѓањето на оружјето од српската воена индустрија во рацете на киевскиот режим“, изразувајќи надеж дека Белград ќе преземе ефективни чекори за да не се нарушат традиционално блиските односи меѓу двете земји.
