Белата куќа организира телефонски разговор меѓу Трамп и Маск по јавната расправија
Белата куќа за денеска закажа телефонски разговор меѓу претседателот на САД, Доналд Трамп, и мултимилијардерот Илон Маск, објави влијателниот „Политико“. Повикот доаѓа по неколкудневна јавна расправија меѓу двајцата доскорешни сојузници, која се одвиваше претежно преку нивните платформи на социјалните мрежи – „X“ на Маск и „Truth Social“ на Трамп.
Според американските медиуми, се очекува разговорот да ги смири тензиите што ескалираа поради несогласувањата околу т.н. „голем, прекрасен закон“ – предлог-закон за даночни олеснувања и државна потрошувачка, кој е централен дел од политичката агенда на Трамп.
Маск, кој до неодамна важеше за близок сојузник на претседателот, во вторникот жестоко го критикуваше законот, нарекувајќи го „одвратен срам“. Тој јавно се спротивстави на притисокот што Трамп го врши врз републиканските сенатори за да го поддржат документот, тврдејќи дека истиот ќе го зголеми федералниот дефицит и претставува финансиска неодговорност.
Во денешна изјава, Трамп истакна дека е „изненаден од нападите на Маск“ и дека не очекувал такви реакции од човек со кого, како што рече, „имал добри односи“.
Останува да се види дали најавениот разговор ќе ги надмине недоразбирањата и ќе доведе до обновување на политичкото партнерство меѓу двајцата влијателни актери.
