Божиновска: Законот за енергетика ќе значи бенефит за граѓаните и сигурност за инвеститорите

„Го донесовме Законот за енергетика. Тој е нов закон усогласен со европските стандарди. Тоа ќе значи многу бенефит и за граѓаните, исто така, тоа ќе значи сигурност за инвеститорите. Ќе имаат многу подобности. Прв пат се воведува енергетска сиромаштија, ќе има граѓански заедници, за прв пат се воведуваат батериите односно системи за складирање на електрична енергија, воведуваме и е-мобилност“ истакна министерката за енергетика, рударство и минерални суровини, Сања Божиновска, во вечерашното интервју за Македонската Радио Телевизија (МРТ) каде зборуваше за актуелните состојби во енергетиката. Во законот, како што посочи министерката, за прв пат се воведува енергетската сиромаштија со што се воведуваат мерки за помош на ранливите категории на граѓани.

За потсетување, Собранието во текот на минатиот месец го усвои Законот за енергетика кој Министерството за енергетика, рударство и минерални суровини го подготвуваше подолг временски период низ инклузивен и транспарентен процес заедно со сите засегнати страни.

Во однос на состојбите во енергетскиот сектор, министерката Божиновска во интервјуто потенцира дека наследиле катастрофална состојба на енергетскиот систем, појаснувајќи дека се работи за „седум години негрижа за енергетските капацитети“ поради што, изминатата година работеле на консолидација на истиот.

„Менаџментот се потруди многу за да ги направи ремонтите за да имаме стабилно снабдување со електрична енергија. Сега приоритетите ни се да го зголемиме производството и секако да го намалиме увозот, а понатаму бидејќи сме земја на сонцето имаме многу сончеви денови сакаме да станеме извозник и на електрична енергија“ изјави Божиновска во интервјуто за МРТ.