Најмалку пет лица загинаа, а повеќе од 20 се повредени во најновиот брутален руски напад врз украинските градови Харкив и Херсон, изведен во текот на ноќта. Нападите доаѓаат неколку дена откако Москва најави „одмазда“ за уништувањето на дел од нејзините воздушни сили.
Во Харкив, вториот најголем град во Украина со околу 1,4 милиони жители, регистрирани се најмалку 40 експлозии во краток временски период, според градоначалникот Игор Терехов. Тој го нарече нападот „најсилен од почетокот на војната“ во февруари 2022 година.
„Непријателот истовремено напаѓа со ракети, дронови Шахед и нaвоени воздушни бомби,“ изјави Терехов, додавајќи дека се користени најмалку 48 дронови Шахед, две ракети и четири бомби со прецизно насочување.
Во Киевскиот округ на Харкив загинаа две лица, додека едно лице загина во Основјанскиот округ. Дваесетина се повредени, дел од нив се во критична состојба.
Во Херсон, брачен пар во педесеттите години загина кога две станбени згради беа погодени од руски проектил. Гувернерот на регионот, Олександар Прокудин, потврди и две повредени лица. Исто така, две лица се повредени и во источниот регион Дњепропетровск.
Украинските власти и натаму предупредуваат на можни нови напади, додека руските сили ја засилуваат употребата на беспилотни летала и прецизни удари во длабочина на украинската територија.
