Германија повторно се соочува со сѐ погласни повици за враќање на задолжителното служење војска, девет години по неговото укинување. Новиот комесар за вооружените сили во Бундестагот, Хенинг Оте од ЦДУ, најави дека ќе предложи повторно воведување на обврзниот воен рок уште оваа година, како одговор на зголемените потреби на армијата.
Оте предупреди дека сегашниот доброволен модел не е доволен за исполнување на стратешките цели и ја предложи шведската пракса како пример, со задолжителна регрутација и подобри бенефиции за службениците, вклучувајќи подобра плата, пензиски бодови и предности за студии.
Од другата страна, владејачката Социјалдемократска партија (СПД) преку Матијас Мирш, категорично ја отфрли оваа идеја, потсетувајќи дека коалицискиот договор предвидува исклучиво доброволна служба. Се наведува дека целта од 60.000 нови војници е остварлива без воведување обврска.
Покрај воените аспекти, се споменува и можноста за општа служба која би важела и за мажи и за жени во социјалниот и цивилниот сектор. Сепак, воведување на обврска за жените би барало промена на Уставот – чекор за кој во моментов нема доволна политичка поддршка.
Дебатата околу задолжителниот воен рок станува сѐ пожестока, особено во контекст на зголемените геополитички тензии и барањата на НАТО.
