Одморите на Јадранот некогаш беа симбол на опуштеност и безгрижно лето. Денес, тие сè почесто стануваат извор на стрес, пресметки и длабоко разочарување. Цените во хрватските туристички центри растат со забрзано темпо, а оваа сезона веќе доби ознака „одмор под хипотека“ на социјалните мрежи.
Без разлика дали станува збор за кафе кое чини пет евра, лежалка која се изнајмува за над илјада евра или порција риба по цена на вечера во Париз, ценовните шокови не ги погодуваат само странските туристи, туку и домашните гости. „Добредојдовте на Ибица“, коментира еден револтиран корисник на Reddit, објавувајќи фотографија од ценовник на плажа во Сплит, каде цените за лежалка варираат од 35 до неверојатни 1.300 евра.
„Додека има овци, ќе има и стрижење“, стои во еден од коментарите кои ја отсликуваат фрустрацијата. Многумина веќе размислуваат да го заменат Јадранот со Грција, Турција или Црна Гора, каде цените сè уште нудат повеќе за вложеното.
Според податоците од платформата Numbeo, Сплит е поскап од познатите европски дестинации како Ибица, барем кога станува збор за угостителските и туристичките услуги. И тоа уште пред официјалниот почеток на сезоната.
Ова лето, велат експертите, ќе биде тест за тоа колку туристите се подготвени да платат за адријатското искуство. Додека цените се качуваат, довербата и задоволството се чини дека одминуваат.
Хрватскиот туризам, одамна препознатлив по природната убавина и гостопримството, ризикува да стане симбол на претераност и алчност. Прашањето што сè почесто се поставува е – дали Јадранот останува дестинација за сите, или станува луксуз резервиран за малкумина?
