Германските вооружени сили имаат рок од три години да ја зајакнат својата борбена готовност за потенцијален напад од Русија на територијата на НАТО, изјави Анет Ленигк-Емден, директорка на Федералната канцеларија за одбранбени набавки, во интервју за весникот Тагесшпигел.
Изјавата доаѓа во контекст на сè поголемата загриженост во германските безбедносни кругови поради можната руска агресија. Началникот на Генералштабот, генерал Карстен Брејер, неодамна предупреди дека Русија би можела да биде подготвена за напад од големи размери на земји-членки на НАТО веќе во 2029 година.
Според Брејер, Москва веќе складира значајни количества муниција и тешка воена опрема, вклучително и тенкови, со фокус на балтичкиот регион.
Стотици милијарди евра за воена надградба
Ленигк-Емден посочи дека новата влада на канцеларот Фридрих Мерц значително ги олеснува инвестициите во модернизација на армијата, доделувајќи стотици милијарди евра за одбранбени цели. Таа нагласи дека приоритет ќе имаат системите за противвоздушна одбрана, како што се мобилните тенкови Skyranger.
– Подготовката за иднината бара забрзано дејствување, а поддршката од новата влада го прави тоа возможно – изјави Ленигк-Емден.
Канцеларот Мерц го постави повторното вооружување како еден од клучните приоритети на својата коалициска влада, со цел Германија да ја изгради најсилната конвенционална армија во Европа.
Цел: Над 200.000 војници до 2031
Според официјалните податоци, германската армија минатата година броела околу 180.000 активни припадници. Новата стратегија предвидува зголемување на човечкиот капацитет на над 203.000 војници до 2031 година, како дел од поширокиот план за одбранбена мобилизација и адаптација кон новите геополитички закани.
