Фоторепортерите неодамна го забележаа американскиот претседател Доналд Трамп како го држи својот мобилен телефон, при што вниманието го привлече една интересна и симболична ситница – на заклучениот екран поставена е негова фотографија. Станува збор за слика во која Трамп, со сериозен израз на лицето, покажува директно кон камерата.
Фотографијата, објавена од агенцијата Reuters, веднаш предизвика лавина реакции на социјалните мрежи и во медиумите. Поддржувачите на Трамп ја опишаа како „симбол на сила, решителност и лидерство“, додека неговите критичари ја оценија како „израз на екстремен нарцизам“, забележувајќи дека на фотографијата нема знаме, семејство или државен симбол – туку само тој, во свој стил.
Уредот што го користи Трамп е iPhone, што не е изненадување. Познато е дека тој со години користи два уреди од овој бренд: еден исклучиво за комуникација на социјалните мрежи, и друг резервиран за телефонски повици. Таа практика датира уште од неговиот прв мандат, кога употребуваше уреди со различно ниво на пристап до интернет и дополнителни безбедносни протоколи.
Трамп не е единствениот претседател кој имал специфични навики кога станува збор за мобилната технологија. Неговиот претходник Барак Обама беше лојален корисник на BlackBerry – најдолго го користеше моделот 8830 World Edition, модифициран со безбедносен софтвер од страна на Агенцијата за национална безбедност (NSA). Во подоцнежниот период, Обама премина на специјализиран уред Selectra Edge, базиран на Windows Mobile платформата.
Џо Бајден, пак, користеше iPhone со заштитна маска на која е втиснат златен претседателски печат – подарок од безбедносните служби. Тој е забележан и со паметниот часовник Apple Watch на раката, што укажува на негова наклонетост кон модерната технологија, но под строго дефинирани безбедносни услови.
