Македонската подружница на глобалниот бренд Кока-Кола се соочува со лавина критики поради промотивна кампања во која, според реакциите на социјалните мрежи, беше навреденo еднo од најзастапените женски имиња во земјата – Наталија.
Причина за револтот е погрешно напишаното име „Наталија“ на етикета од шише од 0,5 литри, каде ракописната кирилична буква „Т“ е заменета со графема што наликува на „М“. Така, наместо Наталија, на етикетата пишува „Намалија“, што предизвика низа реакции на социјалната мрежа Х (поранешен Твитер).
„Вчера сестра ми ми го купила. Името ми го утнале со неправилна буква Т. Еве вака се ‘чува’ јазикот“, напиша корисничка по име Наталија, чиј твит досега доби илјадници прегледи и реакции.
Грешката, која многумина ја толкуваат како непознавање на македонската азбука, ги отвори прашањата за професионалноста и лекторската проверка во маркетинг-кампањите на странските компании кои оперираат во земјава. Дел од корисниците посочуваат дека е веројатно ангажирана агенција или тим што не го владее македонскиот јазик, или пак не ја почитува доволно неговата стандардна форма.
Некои отидоа чекор подалеку, поврзувајќи ја лигатурата со соседна држава и алудирајќи на можна политичка позадина во изборот на графемата.
Иако станува збор за, на прв поглед, ситен пропуст во дизајнот, дебатата на Х привлече внимание од речиси 9.000 корисници, а сè повеќе граѓани ги споделуваат своите искуства со слични јазични пропусти на производи од странски компании.
Од Кока-Кола Македонија засега нема официјална реакција по повод случувањето.
