Јапонија испрати сериознo предупредување до Кина

Јапонија со предупредување до Кина поради носачот на авиони „Лиаонинг“ во близина на Иво Џима

Јапонската влада денеска изрази загриженост поради присуството на кинескиот носач на авиони „Лиаонинг“ во водите источно од островот Иво Џима во Тихиот Океан и најави засилено следење на состојбата, пренесе агенцијата „Ројтерс“.

На редовната прес-конференција во Токио, генералниот секретар на јапонската влада Јошимаса Хајаши потврди дека официјален Токио ѝ упатил „соодветна дипломатска нота“ на Кина во врска со инцидентот.

Според податоците на Здружениот генералштаб на јапонските одбранбени сили, „Лиаонинг“, во придружба на неколку кинески воени бродови, пловел во рамки на ексклузивната економска зона на Јапонија, во близина на ненаселеното островче Минамитори, лоцирано источно од Иво Џима и околу 1.000 километри јужно од главниот град Токио.

Јапонските власти потврдија дека во неделата од палубата на „Лиаонинг“ полетале и слетале борбени авиони и хеликоптери во областа околу Иво Џима, што дополнително ги зголемило тензиите.

Одговор дојде и од кинеското Министерство за надворешни работи, од каде што изјавија дека носачот на авиони дејствувал „во целосна согласност со меѓународното право и поморските практики“.

Портпаролот на кинеската дипломатија, Лин Џиен, на прес-конференција во Пекинг изјави дека Кина доследно спроведува одбранбена политика и ги повика јапонските власти да ја анализираат ситуацијата „објективно и рационално“.