Добијте до 10.000 евра за започнување на сопствен бизнис: Отворен повик за грантови

Отворен повик за грантови од 7.000 до 10.000 евра за невработени лица што сакаат да започнат сопствен бизнис

Министерството за економија го објави новиот повик во рамки на Оперативниот план за активни мерки за вработување за 2025 година, со кој се овозможува финансиска поддршка за невработени граѓани што сакаат да започнат сопствен бизнис.

Преку повикот се нудат две мерки:

За лица постари од 29 години се доделува грант во висина од 430.500 денари (околу 7.000 евра), а за лица со попреченост дополнително се предвидени до 250.000 денари;

За млади до 29 години се нуди финансиска поддршка до 615.000 денари (околу 10.000 евра) за основање сопствен бизнис.

Како што истакна министерот за економија Бесар Дурмиши на денешната прес-конференција во Владата, право на аплицирање имаат сите невработени лица евидентирани во Агенцијата за вработување, вклучително и рурални жени, корисници на гарантирана минимална помош, лица со попреченост, жртви на семејно насилство, повратници од странство и граѓани кои сакаат да ја формализираат својата неформална дејност.

Покрај финансиската поддршка, мерките вклучуваат и обука за претприемништво, изработка на бизнис-план и шестмесечно менторство.

„Целта ни е јасна – да поддржиме што повеќе граѓани кои сакаат да изградат нешто свое на одржлив и легален начин. Ова не е само финансиска помош, туку инвестиција во човечкиот потенцијал и во економскиот развој на државата. Ова не е само ветување, туку создавање реални можности за вработување и напредок“, рече министерот Дурмиши.

Од мерката се исклучени одредени дејности како што се дел од земјоделските активности, такси превозот, игрите на среќа, осигурителните дејности и посредувањето при вработување. Сепак, за руралните жени и лицата со попреченост се предвидени определени исклучоци согласно важечката регулатива.