Балкан

Експерт откри детали за момчето-убиец од Белград: “Сакал да стане психопат”

Случајот „Рибникар“: Продолжува судењето против родителите на Коста К.

Вишиот суд во Белград на 5 јуни ја продолжи кривичната постапка против родителите на Коста К., момчето кое во мај минатата година изврши масакр во основното училиште „Владислав Рибникар“, при што загинаа 10 лица. На рочиштето сведочеше судскиот вештак за невропсихијатрија, д-р Анета Лакиќ, која ги презентираше резултатите од психијатриското и психолошкото вештачење на малолетникот, пренесува српскиот весник Блиц.

Според изнесените наоди, Коста К. не покажал каење, иако бил целосно свесен за тежината на своите постапки. Изјавил дека „не би го направил тоа ако знаел какви ќе бидат последиците“, но не изразил чувство на вина. Вештакот посочи дека момчето се обидувало да ја минимизира сериозноста на делото, користејќи одбранбени механизми – на пример, прекинувал разговори и барал да му се повика лекар кога ќе се соочел со непријатни прашања.

Дополнително, момчето било свесно дека поради својата возраст нема да сноси кривична одговорност. Веднаш по нападот, знаел кого да повика и како да се однесува. Изјавил и дека се чувствува безбедно, бидејќи, како што рекол, е „заштитен од одмазда од страна на родителите на жртвите“.

Во текот на вештачењето било утврдено и дека пред нападот пребарувал информации за доживотен затвор и смртна казна, очекувајќи, наводно, да биде испратен во установа каде ќе има „мир и ќе чита книги“.

„Одреден период имал желба да стане ‘психопат’, инспириран од случаи на малолетни убијци од САД, но подоцна се откажал од таа идеја“, било наведено во извештајот на вештакот.

Во однос на семејните односи, момчето изјавило дека бил најблизок со баба му и чичко му, а остатокот од семејството го опишал како „проколнат“. Исто така, давал лажни информации за своето здравје, тврдејќи дека има астма и дека дедо му починал, со цел да избегнува настава.

На прашање од адвокатот зошто не разговарала со родителите на обвинетиот, д-р Лакиќ одговорила дека тоа би можело да влијае врз објективноста на проценката, бидејќи фокусот бил на перцепцијата и расудувањето на момчето во моментот на извршување на делото.

Судската постапка против родителите продолжува.

Балкан

Турскиот парламент во хаос: Пратеници се туркаат и тепаат за време на расправата за буџет

Дискусијата за предлог-буџетот за 2026 година во Големото национално собрание на Турција вчера прерасна во физички судир меѓу пратениците. По вербални напади и остри обвинувања, дебатата ескалираше до туркање и удирање меѓу парламентарците.

Инцидентот избувна откако пратеникот на владејачката Партија на правдата и развојот (АКП), Мустафа Варанк, изнесе провокативни изјави насочени кон лидерот на опозициската Републиканска народна партија (CHP), Озгур Озел. Варанк го нападна Озел поради фотографии направени на гробот на поранешниот пратеник Камер Генч, што предизвика бурна реакција од заменик-претседателот на пратеничката група на CHP, Гокхан Гунајдин.

„АКП намерно предизвикува контроверзии за време на расправата за буџетот“, рече Гунајдин, додека расправата прерасна во жестоки обвинувања поврзани со наследството на Мустафа Кемал Ататурк. По дополнителни провокации, напнатоста кулминираше со десетминутна физичка пресметка во пленарната сала, додека обезбедувањето и други пратеници се обидуваа да ги раздвојат учесниците.

И покрај инцидентот, пратениците продолжија со работата и го усвоија и предлог-законот за буџетот за 2026 година со 320 гласа „за“ и 249 „против“, како и завршната сметка за 2024 година со 316 гласа „за“ и 247 „против“.

Претседателот Реџеп Таип Ердоган го поздрави усвојувањето на буџетот за 2026 година, истакнувајќи: „Сакам предлог-законот за буџетот на централната држава за 2026 година, кој вечерва беше усвоен во Големото национално собрание на Турција, да биде од корист за нашата земја, нашиот народ и нашата економија“.

Балкан

Евзони под блокада: Граница затворена за сите возила

Од 18:40 часот Граничниот премин Евзони е целосно затворен за сите видови возила кои сакаат да влезат во Грција, соопшти АМСМ. Исклучок се прави само за камиони што веќе се наоѓаат во меѓуграничниот простор.

Причината за блокадата се протестите на грчките земјоделци, кои веќе неколку недели организираат масовни блокади на повеќе патни правци во земјата. Земјоделците изразуваат незадоволство и со овој радикален потег го изразуваат својот револт кон владејачките политики.

Иако на влезот кон Грција сообраќајот е стопиран, камерите на преминот Богородица покажуваат дека на излез од Македонија нема чекање – возилата слободно поминуваат кон границата.

Сообраќајот во овој момент е во потполна застојна состојба, а граѓаните и превозниците се соочуваат со неизвесност околу продолжувањето на преминот.

Балкан

Косово доби моќно оружје

Косово го примило германскиот противтенковски систем „Панцерфауст 3“ како дел од билатералната безбедносна соработка, објавија косовските медиуми. Испораката има за цел зајакнување на одбранбените капацитети на Косовските безбедносни сили (КБС) и нивна постепена модернизација во согласност со стандардите на евроатлантските партнери.

Косовските власти потенцираат дека системот ќе се користи исклучиво за одбранбени цели и професионална обука. „Панцерфауст 3“ е еден од најнапредните противтенковски системи што ги користат неколку европски армии. Договорот со Германија се оценува како дополнителен доказ за поддршката на Берлин за стабилноста и безбедноста во регионот.