Маск застана зад Трамп: Го поддржа повикот до гувернерот на Калифорнија да се извини
Американскиот претприемач Илон Маск по првпат изрази солидарност со американскиот претседател Доналд Трамп по нивниот неодамнешен јавен конфликт, отворено поддржувајќи го неговиот повик до гувернерот на Калифорнија, Гевин Њусом, да се извини на граѓаните.
Американскиот претседател на социјалната мрежа X (поранешен Твитер) јавно ги повика гувернерот на Калифорнија и градоначалникот на Лос Анџелес да им се извинат на жителите поради, како што наведе, низа пропусти, меѓу кои и актуелните протести.
Маск на својата официјална страница објави слика од екранот со таа објава, но без никаков коментар. Неколку минути претходно, повторно сподели уште една порака од Трамп, во која американскиот претседател наведува дека наредил на надлежните безбедносни служби да воспостават ред и закон во Лос Анџелес. Маск ја објави пораката заедно со слика на две американски знамиња.
И покрај оваа поддршка, Маск неодамна го критикуваше Трамп, забележувајќи дека „никој не ѝ штети на неговата репутација повеќе од него самиот“. Конфликтот меѓу двајцата се продлабочи минатата недела кога Маск остро се спротивстави на предложениот закон на Трамп за масовно намалување на федералната потрошувачка, нарекувајќи го „гнасен и одвратен“. Претприемачот повика законот да биде повлечен.
Како реакција, Трамп изрази разочараност од Маск, тврдејќи дека направил многу за него. Маск, пак, возврати дека токму неговата поддршка му помогнала на Трамп да стане претседател и дека благодарение на тоа републиканците добиле контрола врз двата дома на Конгресот.
Немирите во Лос Анџелес започнаа минатата недела по рација на американската имиграциона и царинска служба насочена кон пронаоѓање на нелегални имигранти. Американската армија почна да распоредува единици од Националната гарда, а министерот за одбрана Пит Хегсет не ја исклучи можноста за испраќање на маринци во Калифорнија.
Гувернерот Њусом, пак, повика да се откажат плановите за дополнително воено присуство.
