Македонија

Инженерите предупредуваат: Брзата пруга не смее да го загрози проектот „Вардарска долина“

Здружението „Инженери на Република Македонија“ денеска ги повика Владата и Министерството за транспорт да ја преиспитаат трасата на идната брза железничка пруга, со цел да не се загрози реализацијата на стратешкиот енергетски проект „Вардарска долина“.

Во претставка поднесена до надлежните институции, инженерите бараат да се исклучи можноста новата железничка линија да поминува низ просторот резервиран за изградба на хидроелектраните, оценувајќи дека тоа би го компромитирало потенцијалот за развој на обновливи извори на енергија и би ја попречило енергетската иднина на земјата.

„Во време кога светот се стреми кон обновливи извори на енергија и одржлив развој, ‘Вардарската долина‘ се наоѓа на крстопатот на историската одлука на оваа Влада што ќе го одреди правецот на нашата енергетска иднина. Дванаесетте хидроелектрани планирани во оваа регија не се само инфраструктурни проекти – тие се стратегиски столб на домашната економија, извор на чиста, зелена енергија и значителен потенцијал за раст и просперитет на Македонија“, се вели во соопштението.

Инженерите посочуваат дека проектот „Вардарска долина“ не нуди само енергетска стабилност, туку и бројни економски и еколошки придобивки: намалување на зависноста од фосилни горива, подобра заштита од поплави, управување со водните ресурси, поголем аграрно-производствен капацитет преку системи за наводнување и заштита на плодното земјиште од ерозија.

„Придобивките од обновливата енергија се инвестиција не само во денешницата, туку и во иднината на нашите деца и внуци. Но, потенцијалот на овој проект е загрозен од тековните планови за трасата на брзата пруга, која, ако се реализира по постоечкиот колосек, ќе ја исклучи можноста за развој на хидроенергетските капацитети во ‘Вардарската долина’. Ова не е само техничко прашање, туку морална и еколошка одговорност да не им го одземеме правото на идните генерации да ја користат енергијата и придобивките од акумулациите што ‘Вардарската долина’ може да ги понуди“, наведуваат од Здружението.

Тие истакнуваат дека трасата на брзата железничка пруга може да се адаптира и пренасочи на локации кои ќе овозможат хармоничен развој и на транспортната инфраструктура и на хидроенергетиката.

„Го повикуваме Министерството за транспорт да не го наруши концептот ‘Вардарска долина’. Само така можеме да изградиме иднина во која енергијата слободно ќе тече по Вардар, а со неа и просперитетот за сите нас“, апелираат инженерите.

Железничката пруга – државна инвестиција од две милијарди евра

Министерот за транспорт Александар Николоски, во интервју за емисијата „360 степени“, најави дека државата ќе инвестира околу две милијарди евра во изградба на брза пруга на релација Табановце – Гевгелија. Според плановите, пругата треба да биде готова до 2031 година, а враќањето на инвестицијата се очекува за 10 до 12 години.

Со ова, прашањето за усогласување на двете клучни инфраструктурни иницијативи – железничката и хидроенергетската – се поставува како еден од најголемите предизвици за националното планирање и развој.

Македонија

По заминувањето на Коцевски, Советот на јавни обвинители ќе постави вршител на должност

Советот на јавни обвинители на седницата закажана во 11 часот денес, треба да именува вршител на должноста државен јавен обвинител, откако актуелниот обвинител Љупчо Коцевски пред два дена поднесе неотповиклива оставка. Назначувањето ќе се врши согласно член 25, став 3 од Законот за јавно обвинителство.

Оставката на Коцевски беше соопштена на прес-конференција, непосредно пред почетокот на собраниската седница на која, по предлог на Владата, требаше да се отвори расправа за негово разрешување. Со тој потег, тој практично ја пресече постапката што ја иницираше извршната власт.

Коцевски оцени дека станува збор за опасен преседан со долгорочни последици врз институционалниот поредок и уште еднаш потенцираше дека обидот за негово разрешување е мотивиран исклучиво од политички причини.

„Од самиот почеток тврдев дека евентуалната постапка за мое разрешување е политичка одлука. Токму затоа денеска поднесов неотповиклива оставка“, изјави Коцевски на прес-конференцијата.

Од друга страна, Владата го оправда предлогот за негово разрешување со наводи дека Коцевски направил сериозни професионални пропусти и дека со своето работење го нарушил угледот на Јавното обвинителство.

Македонија

Лидерот на СДСМ во Битола си поднесе оставка

Претседателсот на Општинската организација на СДСМ во Битола, Методија Куновски, поднесе оставка само еден ден по изборот на Драган Крајовски во Извршниот одбор на партијата, како дел од новиот тим на лидерот Венко Филипче. Оваа изненадувачка одлука го отвора прашањето за внатрепартиските промени и новите динамики во битолската организација.

Куновски, кој ја презеде функцијата на чело на битолската организација во ноември минатата година, објави дека оставката ја доставил лично до претседателот Филипче. На последните локални избори во Битола, тој беше кандидат за градоначалник, предизвик кој, според него, никој друг не сакаше да го прифати поради извесната загуба на СДСМ.

„Одлуката ја донесов по темелна и одговорна лична и политичка проценка. Како претседател се соочував со сериозна дилема помеѓу обврската кон организацијата и впечатокот дека принципите што ги застапуваме јавно сè потешко се применуваат во пракса. Социјалдемократијата во која верувам не е декларација, туку вредносен систем што мора да се живее секојдневно – низ транспарентност, вклученост и политичка одговорност“, напиша Куновски на Фејсбук.

Поранешниот новинар, а денес вработен во прес-службата на РЕК „Битола“, потенцира дека функцијата ја прифатил со искрена намера да ја зајакне организацијата, да ја отвори кон членството и да ја врати довербата кај граѓаните. Но, како што истакнува, во изминатиот период сè појасно се појавиле практики кои не се во согласност ниту со неговите лични принципи, ниту со вредностите на социјалдемократијата.

„Не можам и не сакам да носам функција без суштинска можност за влијание, ниту да бидам формално присутен во процеси со кои суштински не се согласувам. Политичката и моралната одговорност налагаат јасен став и чесен чекор кон членството и граѓаните на Битола“, додава Куновски, благодарејќи им на членовите за поддршката.

Оставката на Куновски следува по одлуката на лидерот на СДСМ, Венко Филипче, да го врати Драган Крајовски во Извршниот одбор. Крајовски, кој претходно беше претседател на битолската општинска организација, го заменува Методија Илиевски, разрешен потпретседател и член на ИО.

Крајовски има богата партиска биографија – по професија е правник и адвокат, поранешен директор на затворот „Црн Мост“ во Битола, лидер на младината на СДСМ во градот и член на Централниот одбор на партијата. Битолчани го гледаат како „големо враќање“ во партијата, а тој важеше и за близок соработник на поранешниот директор на ЕСМ, Васко Ковачевски.

Со оваа динамична промена на лидерската позиција, СДСМ во Битола влегува во нова етапа, а политичките движења во градот ветуваат уште повеќе интересни пресврти.

Македонија

Стабилно време со магла до понеделник, дожд од вторник

До понеделник се очекува стабилно и претежно тивко време низ земјава, со појава на магла во утринските часови и зголемена облачност на некои места.

Утре, 18 декември, времето ќе биде променливо облачно со сончеви периоди, додека претпладне на одредени места ќе се појави магла. Ветарот ќе биде слаб и променлив.

Во Скопје се очекува слично време, со претежно тивко време и појава на магла во котлинските делови претпладне.

Стабилното време ќе се задржи до понеделник, а од вторник се најавуваат локални врнежи од дожд.