Култура

„Извор“ – 20 години чување на традицијата, вечерва на сцената во Тетово

По две децении вредна посветеност и љубов кон народната традиција, Културното уметничко друштво „Извор“ – Јегуновце вечерва во 19:30 часот во Домот на културата „Иљо Антески – Смок“ во Тетово ќе го одржи својот јубилеен концерт по повод дваесет години постоење. На сцената ќе настапат различни секции на „Извор“, заедно со фолклорниот ансамбл КУД „Брвеница“ од Брвеница како специјални гости. Покрај играорниот дел, гостите ќе уживаат и во изведба на народни македонски песни, како и селски „гласоечки“ изведби.

„Извор“ – Јегуновце е формирано во 2005 година, од љубители на фолклорот во општина Јегуновце и поранешни членови на КУД „Југохром“.Уметнички раководител уште од основањето е Јовица Блажевски – истакнат кореограф и раководител на играорниот кор на „Танец“, додека претседател последните години е Ненад Блажески.

Во текот на две децении „Извор“ ја негува и промовира локалната и богатата македонска фолклорна традиција. Во својот репертоар друштвото досега има реализирано преку илјада члена, а ги изведува кореографски постановки од речиси сите региони на земјата. Биле учесници на многу домашни фестивали и концерти, како и многу меѓународни, меѓу кои се издвојува меѓународниот и светски афирмираниот фестивал „Гората“ во Закопане, Полска, каде „Извор“ ја освои „Сребрената секира – награда за трето место“.

Со овој концерт, „Извор“ ја слави својата 20-годишна посветеност кон фолклорот и ја зацврстува својата улога како чувар и промотор на македонското народно наследство. Вечерва, Тетово ќе биде домаќин на вистински празник на традицијата и заедништвото.

Култура

Голема загуба за Драмски театар Скопје – почина актерот Лазе Манасков

Со длабоко жалење, Драмски театар Скопје соопшти дека денеска почина нивниот актер и долгогодишен колега, Лазе Манасков.

Во чест на Манасков, вечерва ќе се одржи изведба на претставата „Куршуми над Бродвеј“, посветена на неговото творештво и придонес кон театарската сцена.

„Нека му е вечна слава“, стои во соопштението на театарот, изразувајќи почит и благодарност за неговиот ангажман и наследство во македонскиот театар.

Култура

80 години МНТ: Одбележани со премиера на монографија и театарски настап

Во фоајето на Македонскиот народен театар, се одржа свечена промоција на монографијата „Македонски народен театар 1945 – 2025 – Приказни поголеми од времето“, по повод 80 години од своето постоење. Монографијата е објавена со поддршка на Министерството за култура и туризам на Р. Македонија и претставува вистински поклон за сите кои ја ценат македонската театарска традиција и нејзината бесценета историја.

Ивана Јарчевска е главната уредничка на монографијата, а текстовите се дело на врвни автори и истражувачи: д-р Ана Стојаноска, Снежана Коневски-Руси, Загорка Поп-Антоска-Андовска, Бранко Ставрев, Емил Рубен, Игор Џамбазов, Лилјана Мазова, Братислав Димитров, Ѓорѓи Јолевски, Сашко Насев, Никола Ристановски, Дејан Дуковски, Звездана Ангеловска, Весна Петрушевска, Срѓан Јаниќијевиќ, Тања Кочовска, Синиша Евтимов, Искра Ветерова, Бојан Трифуновски, Сашко Коцев, Николина Кујача, Нела Витошевиќ, Сашка Димитровска, Нина Николиќ, Дарја Ризова, Драгана Костадиновска и Борче Начев.

Настанот привлече голем број уметници, театарски професионалци и љубители на сценската уметност, кои со восхит и почит ги проследија сведоштвата, документите и личните приказни што ги нуди ова издание. Меѓу присутните беше и министерот за култура и туризам, Зоран Љутков.

Култура

Филозофскиот факултет во Скопје празнува 105 години инспирација и образование

Големата сала на Македонската филхармонија денес ќе биде епицентар на македонската интелектуална историја. Со свечена академија, Филозофскиот факултет одбележува 105 години постоење — импозантен јубилеј на институцијата која ја постави темелната плоча на високото образование во земјава.

Пред присутните ќе се обратат клучните фигури на образовниот систем: министерката за образование и наука, Весна Јаневска, ректорката на УКИМ, проф. д-р Биљана Ангелова, како и деканот на факултетот-домаќин, проф. д-р Оливер Бакрески. Овој настан не е само прослава, туку и поклон пред традицијата на првата единица на скопскиот универзитет, која веќе повеќе од еден век е симбол на македонскиот стремеж кон знаење и наука.

Денешниот ден е резервиран за чествување на столбот на македонската едукација. Во срцето на Скопје, под сводовите на Македонската филхармонија, Филозофскиот факултет со свечена академија ќе ги одбележи своите 105 години. Како прв факултет во рамките на Универзитетот „Св. Кирил и Методиј“, тој останува живиот доказ за институционализацијата на македонската наука.

Говорницата ќе ја споделат министерката Весна Јаневска, ректорката проф. д-р Биљана Ангелова и деканот проф. д-р Оливер Бакрески, кои ќе се осврнат на значењето на овој факултет како лулка на интелектуалната елита низ децениите.