Францускиот претседател Емануел Макрон денеска ги повика израелските власти итно да им дозволат враќање во Франција на шесте француски државјани кои се наоѓаат на бродот „Мадлин“ со хуманитарна помош.
Покрај тоа, францускиот министер за надворешни работи, Жан-Ноел Баро, побара пристап на француските државјани до францускиот конзулат и истакна дека конзулатот ќе ги посети веднаш штом бродот пристигне во пристаништето Ашдод, јави телевизијата BFM.
Во соопштението на Баро се додава дека француската влада предупредила и се обидела да ги одврати учесниците во мисијата кои преку едрилица „Мадлин“ планираа да достават хуманитарна помош во Појасот Газа.
Од Министерството за надворешни работи на Израел соопштија дека израелските сили уапсиле активисти од бродот „Мадлин“, кои се упатиле да им ја достават помошта на Палестинците во Појасот Газа. Активистите, меѓу кои и Грета Тунберг, ќе бидат вратени дома, објави израелското МНР.
Дванаесет активисти за поддршка на Палестина изјавија дека патуваат кон Газа со цел да ја зголемат свеста и да достават помош. Коалицијата „Слободна флота“, организатор на патувањето на едрилицата, соопшти дека изгубила контакт со бродот откако израелската војска се качила на него.
Телевизијата Ал Џазира пренесе дека израелските војници им наредиле на уапсените активисти да ги фрлат мобилните телефони во море.
Макрон се осврна и на ситуацијата со Гренланд, пред најавената посета на ова стратешко островско подрачје.
„Гренланд не е предмет на окупација, ниту Антарктикот или длабокото море се за продажба“, рече Макрон во своето воведно обраќање на конференцијата на Обединетите нации за заштита на океаните, која се одржува во францускиот приморски град Ница. Ова беше индиректна критика кон американскиот претседател Доналд Трамп и неговите континуирани закани за анексија на островот, јави BFM.
Макрон во недела ќе го посети Гренланд, каде што ќе разговара со премиерот на оваа автономна територија во состав на Данска, Јенс-Фредерик Нилсен, и премиерката на Данска Мете Фредериксен. Теми на разговор ќе бидат безбедноста на северниот Атлантик и Арктикот, климатските промени, енергетиката и критичните минерали, соопшти Кабинетот на францускиот претседател.
Откако Доналд Трамп се врати во Белата куќа, повеќепати изрази желба да го контролира Гренланд, кој е стратешки позициониран и богат со минерали.
