Се проширува истрагата за трагичниот пожар во дискотеката „Пулс“ во Кочани
Обвинителството ја проширува истрагата за катастрофалниот пожар во кочанската дискотека „Пулс“, во кој животот го загубија 62 лица, а повеќе од 200 беа повредени.
Нова истрага е отворена против уште едно лице – реалниот сопственик на агенцијата за обезбедување која дејствувала во клубот без склучен договор и без примена на пропишаните безбедносни протоколи.
Како што соопшти Обвинителството, осомничениот го раководел работењето на агенцијата од Скопје. Таа, заедно со управителот и овластениот претставник од Кочани, обезбедувала ред и сигурност во дискотеката, иако немала правен основ за тоа. Во текот на 2025 година, обезбедувањето било вршено без извршена безбедносна проценка, без план за евакуација и без проценка на ризици од пожари – спротивно на Законот за приватно обезбедување.
Дополнително, според наодите на истрагата, осомничените дозволиле влез на малолетни лица и не спречиле внесување и употреба на пиротехнички средства од страна на музичкиот состав што настапувал таа вечер. Тие пропусти, како што се наведува, директно придонеле за настанување на пожарот и трагичниот исход.
По судска наредба, извршени се претреси на две локации во Скопје и Пробиштип, како и на возилото на осомничениот. При тоа се одземени документи и електронски уреди. Лицето е лишено од слобода, а Обвинителството денеска ќе поднесе барање за определување мерка притвор до Основниот кривичен суд во Кочани.
