Одделот за сузбивање на организиран и сериозен криминал, во координација со Одделот за криминалистичка полиција, Управата за финансиска полиција и Управата за јавни приходи, поднесе обемна кривична пријава до Основното јавно обвинителство за гонење на организиран криминал и корупција.
Пријавата се однесува на 30 физички и 15 правни лица од Струмица, кои се товарат за сериозни кривични дела како „злосторничко здружување“, „перење пари и други приноси од казниво дело“, „даночна измама“ и „несовесно работење во службата“.
Како организатори на криминалната шема се посочуваат Р.К. (56), З.К.В. (30) и В.П. (29), кои во текот на 2019 година оформиле злосторничко здружение, со цел извлекување нелегална добивка на сметка на државниот буџет. Кон здружението се приклучиле повеќе управители на фирми, инспектори од УЈП, како и овластени сметководители.
Преку 15 фирми, дел фиктивно основани, дел под нивна реална контрола, биле изготвувани и заверувани лажни фактури со невистинита содржина, при што се прикажувал фиктивен промет на добра и услуги без реална економска основа.
Во оваа сложена криминална шема, која функционирала од 2019 до 2024 година, осомничените успеале да извлечат незаконска имотна корист во износ од 5.801.937.796 денари, што изнесува околу 94,3 милиони евра.
Надлежните институции најавуваат продолжување на истрагата и проширување на истражните дејствија, со цел целосно расчистување на овој случај, кој се смета за една од најголемите финансиски измами во историјата на Македонија.
