Приведен струмичкиот бизнисмен Ристо Крмзов – осомничен за економски криминал поврзан со политички структури
Утрово, по налог на јавен обвинител, припадници на Бирото за јавна безбедност при МВР, во координација со Министерството за финансии – Управата за финансиска полиција и Управата за јавни приходи, започнаа акција за откривање на широка економско-криминална шема во која се опфатени 15 правни и 23 физички лица.
Меѓу приведените е и познатиот струмички бизнисмен Ристо Крмзов, кој важи за долгогодишен близок соработник на поранешниот премиер Зоран Заев.
Според информации добиени од истрагата, станува збор за организирана криминална структура која, преку фиктивни прикажувања на добивки и симулирано плаќање даноци, успеала да наплати значителни износи од ДДВ поврат. За реализација на шемата се користеле фиктивни фирми, лажни трансакции и непостоечки физички лица од Косово и други земји, со што се прикривале криминалните активности.
Истрагата открива дека украдените средства, преку монтирани државни исплати, завршувале во приватни сметки, по што биле „испрани“ преку градежниот сектор – кој со години важи за канал за легализација на незаконски стекнат капитал.
Крмзов, според извори блиски до истрагата, бил заштитен од одредени политички и економски структури, и токму поради тие врски со години уживал финансиски бенефити. Името на Крмзов се поврзува со сомнителни приватизации на државен имот, нерегуларно издадени градежни дозволи, сомнителни банкарски кредити, трансфери на имот на блиски фирми и роднини, како и со капитал на поранешни функционери.
Истражителите го разгледуваат и случајот со префрлување на над 8 милиони евра од сега веќе пропаднатата Еуростандард банка на сметки во Турција, при што дел од средствата биле поврзани со компании под контрола на Крмзов. Овој случај беше јавно обелоденет уште во септември минатата година, со наводи дека постоеле обиди за прикривање на предмети во обвинителството.
Дополнително, во шемата биле вмешани и вработени во Царинската управа. За увезена стока за која царинската вредност реално изнесувала десеткратно повеќе, се плаќале симболични 1.500 евра царина по камион.
Во претходна акција на надлежните органи во просториите на фирмите поврзани со Крмзов беа пронајдени дијаманти, големи суми готовина, документација што укажува на даночни затајувања и нелегални финансиски трансакции.
По пропаѓањето на Еуростандард банка, нејзиниот сопственик Трифун Костовски јавно изјави дека загубата од над 60 милиони евра е резултат на договори меѓу делови од бизнис-кругот на тогашната владејачка гарнитура и менаџментот на банката.
