Истрага на рускиот истражувачки медиум IStories открива дека безбедноста на популарната апликација за пораки Telegram е далеку помала отколку што досега се верувало. Иако Telegram е промовиран како платформа за слободна комуникација и приватност, истражувањето покажува дека компаниите кои ја одржуваат нејзината серверска инфраструктура се поврзани со руските безбедносни служби, вклучително и со Федералната служба за безбедност (ФСБ).
Станува збор за компанијата Global Network Management (GNM), регистрирана на Антигва и Барбуда, која поседува над 10.000 IP-адреси користени од Telegram. Нејзин сопственик е рускиот државјанин Владимир Веденеев, кој сведочел пред американски суд дека неговата компанија ја одржува Telegram инфраструктурата и има персонал во Русија. Веденеев воедно е и финансиски директор на Telegram.
До 2020 година, овие IP-адреси биле во сопственост на руската компанија Globalnet, која има преку 18.000 километри оптичка мрежа во Русија и до неодамна соработувала со бројни државни институции, вклучително и со одбранбениот сектор и аналитичките центри на Кремљ. Истите компании, според документите, инсталирале и опрема за следење интернет-сообраќај (DPI) по барање на руските власти.
Дополнително, во 2022 година, високи руски политичари директно изјавиле дека Telegram постигнал договор со ФСБ за пристап до комуникации поврзани со „терористи и други сомнителни лица“. Технолошките детали откриваат дека Telegram не користи автоматска end-to-end енкрипција, освен кај т.н. „тајни четови“, што значи дека податоците се складирани на сервери и потенцијално достапни за трети страни.
Според експертите за сајбер-безбедност, идентификациските клучеви кои Telegram ги доделува на секоја порака може да се искористат за следење на корисниците и нивните контакти, особено ако компаниите што ја одржуваат инфраструктурата соработуваат со разузнавачки служби.
Telegram и основачот Павел Дуров не одговориле на прашањата испратени од страна на IStories.
