Утрово околу 10 часот во средното училиште BORG Dreierschützengasse во Грац се случи крвав напад со огнено оружје, во кој загинаа 11 лица, меѓу кои и напаѓачот. Според првичните информации, 21-годишниот напаѓач, поранешен ученик во училиштето, сам го извршил нападот, користејќи пушка и пиштол – двете оружја во негова легална сопственост.
Покрај загинатите, 11 лица се ранети, од кои седум се во критична состојба. Меѓу жртвите има и две лица со потекло од Босна и Херцеговина. Напаѓачот извршил самоубиство во тоалетот на училиштето, а во неговиот дом е пронајдено проштално писмо.
Сцените од местото на нападот се потресни. Учениците во паника бегале од училиштето, а некои од нив нашле засолниште во блискиот супермаркет. Родители и очевидци опишуваат моменти на страв и неизвесност.
Австрискиот фудбалски клуб SK Sturm Graz повика граѓаните да даруваат крв за повредените. Истражителите и понатаму работат на утврдување на мотивите за нападот, а јавноста е во шок од најтрагичниот настан од ваков тип во Австрија во последните години.
