Околу 700 маринци ќе бидат привремено распореди од американската војска во Лос Анџелес, додека не пристигне дополнително засилување од Националната гарда, соопшти неименуван функционер на американската администрација.
Во неделата, околу 300 припадници на Националната гарда на Калифорнија беа распоредени на улиците на Лос Анџелес, како одговор на трет ден од протестите против имиграциските политики на претседателот Доналд Трамп. Демократскиот гувернер на Калифорнија, Гевин Њусом, овој потег го оцени како нелегален.
Функционерот, кој зборуваше под услов на анонимност за американски медиуми, изјави дека во Лос Анџелес ќе биде испратен батаљон маринци, но засега нивното присуство нема да биде регулирано преку Законот за бунт, кој не се очекува да биде активиран.
Се очекува Националната гарда да достигне бројност од околу 2.000 војници до среда, додека маринците ќе обезбедуваат логистичка и техничка поддршка до тогаш. Сѐ уште не е прецизирано кои ќе бидат нивните конкретни задачи, објавија американските медиуми.
Функционерот додаде дека ситуацијата е динамична. Иако американската војска не смее да врши полициски овластувања на домашна територија без активирање на Законот за бунт, Пентагон често е вклучен во национални кризни ситуации – од гранични мисии до поддршка при природни катастрофи и здравствени вонредни состојби. За време на пандемијата од Ковид-19, војската постави и импровизирани болници низ земјата.
