Премиерот Христијан Мицкоски денеска најави дека Владата ќе обезбеди финансиска поддршка од 250 евра за студентите за набавка на електронски уреди, почнувајќи од септември оваа година. Средствата се веќе предвидени во државниот буџет, а постапките за реализација се во тек.
„250 евра за електронски уреди. Тие пари се предвидени во буџетот. Процедурата во рамките на Владата, односно Генералниот секретаријат, е отпочната. Се дефинираат критериумите и нормално е дека чекаме да отпочне новата студентска година затоа што еден од критериумите е да студентите имаат заверен семестар“, изјави Мицкоски.
Тој додаде дека оваа поддршка ќе биде достапна и за новозапишаните бруцоши, откако ќе го заверaт првиот семестар. Според проценките, околу 55 илјади студенти од државните и приватните универзитети ќе можат да аплицираат за оваа помош.
Мицкоски исто така најави и ученички стипендии за наредната година. Во однос на критиките од одредени политички субјекти, тој истакна дека Владата ќе ги исполни ветувањата.
„Тоа што ние го ветуваме, го испорачуваме, но се разбира во зависност од приоритетите. Многу дупки и лоши работи од минатото мора да се санираат“, изјави премиерот по отворањето на целосно реконструираното Одделение за управни работи – Скопје, во зградата на МРТВ.
