Балкан

Вучиќ победи со водство од 51 глас, студентите повторно на улица

Избори во Косјериќ и Зајечар: Победа на СНС, обвинувања за нерегуларности и протести

Завчера се одржаа локални избори во општина Косјериќ и градот Зајечар, на кои право на глас имаа околу 55.000 граѓани. Изборите се сметаа за прв сериозен политички тест по месеците антивладини протести и студентски блокади.

Гласањето претставуваше испит и за владејачката коалиција предводена од Српската напредна партија (СНС), но и за опозицијата и студентското движење, кое доби силна поддршка по политичката и општествена криза предизвикана од трагедијата на железничката станица во Нови Сад.

Претседателот Александар Вучиќ, поранешен лидер на СНС, веднаш прогласи победа. Во обраќање до јавноста ги обвини опозициските сили за „линч, прогон на граѓани“ и „невидено кршење на изборните норми“, нагласувајќи дека и покрај тоа СНС победила и во двете општини — убедливо во Зајечар, а тесно во Косјериќ.

Вучиќ изјави дека нивните партнери ја победиле „обоената револуција“ финансирана од странство, без да посочи конкретни имиња.

Во Косјериќ, каде што 8.897 гласачи избираа помеѓу три листи, конечните резултати покажуваат тесна победа на СНС:

„Не ја даваме Србија – Александар Вучиќ“: 3.686 гласови (49,23%) – 14 мандати

„Обединети за Косјериќ“: 3.635 гласови (48,54%) – 13 мандати

Опозициската листа не ги призна резултатите, обвинувајќи за големи нерегуларности и најавувајќи барање за повторување на изборите. Според нив, важечки ливчиња биле прогласени за неважечки, а првичните податоци укажувале на нивна предност.

Студентското движење повика на протест за „одбрана на изборната волја“, при што голем број граѓани и студенти се собраа пред општинската зграда во Косјериќ. Протестот помина со навредливи скандирања кон Вучиќ и силно полициско обезбедување.

Во Зајечар, каде што граѓаните избираа помеѓу осум листи, резултатите се следни:

„Не ја даваме Србија – Александар Вучиќ“: 14.199 гласови (47,13%) – 27 мандати

„Промена во која веруваме“: 10.312 гласови (34,23%) – 19 мандати

„Обединети за спас на Зајечар“: 2.284 гласови (7,84%) – 4 мандати

Пет листи, меѓу кои и Социјалистичката партија на Србија, не добија мандати. Излезноста во Зајечар била 63,64 проценти. Градската изборна комисија соопшти дека изборниот ден поминал мирно, но и тука опозицијата пријави изборни нерегуларности и обвини за изборна кражба.

Миладин Крстиќ од „Обединети за спас на Зајечар“ изјави дека имаат видео-докази за поткуп на гласачи и најави поднесување пријава до обвинителството. Тој рече дека опозицијата нема да бара повторување на изборите, но очекува признавање на, како што ја нарече, вистинската победа.

Балкан

Дискусија во Корча: ОБСЕ ги поврзува македонското и другите малцинства во Албанија

Под покровителство на ОБСЕ, во Корча се одржа значајна тркалезна маса, посветена на правата на малцинствата во Албанија. Во фокусот на дебатата беа горливите предизвици со кои се соочува македонската заедница, а нивните барања силно ги артикулираше Васил Стерјовски, претседател на Македонската алијанса за европска интеграција (МАЕИ).

На средбата присуствуваше и амбасадорот на ОБСЕ во Албанија, Мишел Таран, со чија поддршка Стерјовски изрази длабока благодарност за посветеноста на Организацијата кон малцинските права.

Стерјовски остро ги потенцираше клучните прашања за кои е неопходна итна поддршка. Тој побара зајакнување на образованието на македонски јазик – клучен столб за зачувување на националниот идентитет, загарантирани квоти за малцинствата во албанското Собрание – за обезбедување соодветна политичка застапеност, поголема застапеност на Македонците во институциите на сите нивоа и поддршка за економски развој на регионите населени со Македонци, како начин да се запре иселувањето.

Во исклучително отворен тон, Стерјовски посебно се осврна на, како што нагласи, „актуелната политика на Бугарија за асимилација на Македонците во Албанија”.

„Ова е сериозен предизвик за нашиот идентитет и култура“, предупреди Стерјовски, додавајќи дека ваквите притисоци претставуваат директна закана за опстанокот на заедницата.

На крајот, претседателот на МАЕИ изрази огромна благодарност до амбасадорот Таран за неговата „безрезервна поддршка и охрабрувачките зборови”, кои, како што заклучи, им даваат нова сила и мотивација да продолжат со „борбата за зачувување на македонскиот јазик, идентитет и култура”.

Балкан

Македонско друштво “Илинден“-Тирана со повик до Македонците во Албанија да се самоизјаснат за Македонци

Драги сограѓани Македонци во Република Албанија,

Македонско друштво “Илинден“-Тирана ви се обраќа со овој отворен и искрен повик, во момент од особено значење за афирмацијата на нашиот идентитет, достоинство и права како автохтона македонска заедница во Албанија.

Врз основа на Законот бр. 96/2017 „За заштита на националните малцинства во Република Албанија“ и Одлуката на Советот на министри „За утврдување на критериумите, документацијата и постапките за собирање на податоци за идентификација на лицата кои припаѓаат на националните малцинства“, секој граѓанин има неотуѓиво право слободно да се самоидентификува, без притисок и без страв, како припадник на официјално признаено национално малцинство.

Овој процес претставува значаен чекор кон:

зачувување и зајакнување на македонскиот национален, јазичен и културен идентитет;
унапредување на институционалната застапеност на македонската заедница;
креирање на поправедни државни политики, прилагодени на реалните потреби на националните малцинства;
гарантирање поддршка и одржлив развој на нашата заедница.

Македонско друштво “Илинден“-Тирана упатува повик до сите Македонци во Република Албанија без двоумење да се самоизјаснат, со пополнување на соодветните формулари за самоидентификација и нивно доставување по пошта до Комисијата формирана при Министерството за внатрешни работи, согласно утврдените постапки.

Сакаме јасно да нагласиме дека:

процесот се темели на принципот на слободно самоидентификување;
личните податоци се заштитени во целосна согласност со законодавството за заштита на приватноста;
не постои никаков ризик ниту негативна последица за граѓаните кои ја изјавуваат својата национална припадност.

Самоизјаснувањето не е само законско право, туку и чин на граѓанска и национална одговорност, кој го зајакнува нашиот колективен глас и ја обезбедува иднината на идните генерации.

Заедно, со храброст, свест и доверба, да придонесеме во изградбата на пофер, поинклузивно и подемократско општество, во кое македонскиот идентитет во Република Албанија се почитува, признава и поддржува.

Балкан

Трагедија на планина во БиХ: Спасувачи со часови се бореа да го извлечат телото на загинатиот планинар

Исклучително тешка и напорна акција за извлекување на телото на трагично починатиот планинар ја одбележа вчерашната вечер на планината Височица во Босна и Херцеговина.

Спасувачката операција, која започна уште во недела попладне, се претвори во вистинска драма. Непристапниот терен и исклучително тешките физички услови драстично ја отежнаа мисијата на храбрите тимови.

„Се надеваме дека хеликоптерот ќе може да пристапи, во спротивно евакуацијата ќе продолжи цела ноќ. Теренот е исклучително тежок“, објавија спасувачите на својот Фејсбук профил, најавувајќи ја исцрпувачката ноќ пред нив.

Надежта дека хеликоптер на ЕУРОФОР ќе може да го извлече телото згасна со паѓањето на темнината. Иако локацијата првично беше проценета како погодна за воздушен транспорт, ноќта ги принуди спасувачите да продолжат со пешачка евакуација.

Во битката со планинските предизвици учествуваа 20 несебични спасувачи од Службата за спасување Прењ, ГСС Јабланица и ГСС Кантон Сараево, кои вложија надчовечки напори во оваа тажна мисија.

Video | Facebook