Технолошкиот гигант Google повторно нуди отпремнини за вработените во клучни оддели, како дел од поширока програма за заштеда, насочена кон големи инвестиции во областа на вештачката интелигенција, објави CNBC.
Понудите се однесуваат на вработени во неколку значајни сектори – вклучувајќи ги Одделот за знаење и информации (кој ги опфаќа Google Search, Ads и E-Commerce), Централното инженерство, како и тимовите за маркетинг, истражување и комуникации. Засега не е објавено точно колку вработени се засегнати.
Новата рунда на отпремнини претставува продолжение на реструктурирањата кои започнаа уште во јануари 2023 година, кога компанијата отпушти 12.000 луѓе. Актуелната програма се однесува на вработени во САД и е доброволна.
Околу 20.000 вработени моментално работат во Одделот за знаење и информации. По реорганизацијата во октомври 2024 година, раководењето со одделот го презеде менаџерот Ник Фокс. Во интерно писмо, тој ги повика вработените внимателно да ја разгледаат понудата и истакна дека Google има амбициозни планови и потреба од мотивиран тим.
„Ако вашата работа ве инспирира, ако сакате да се соочите со предизвиците што претстојат и ако сте добри во тоа што го правите – искрено се надевам дека ќе останете со нас“, напиша Фокс.
Во меѓувреме, новиот финансиски директор на Google, Анат Ашкенази, најави дополнителни мерки за рационализација на трошоците. Целта е да се обезбеди доволно простор за огромните капитални вложувања во инфраструктура за вештачка интелигенција во текот на 2025 година.
Во рамки на преструктурирањето, компанијата го трансформира и својот внатрешен едукативен систем. Наместо општи програми, фокусот ќе биде ставен на обуки поврзани со користење на AI алатки во секојдневната работа на вработените.
