Иако официјално најави испорака на шест борбени авиони, Норвешка во текот на 2024 година ѝ испорачала вкупно 14 F-16AM авиони на Украина, објави „DefenseNews“ повикувајќи се на годишниот извештај за трговија со конвенционално оружје.
Станува збор за модерни, повеќенаменски авиони од западен тип кои играат клучна улога во трансформацијата на украинското воено воздухопловство според НАТО стандарди. Испораката прв ја забележал белгискиот аналитичар Jeff2146 на мрежата X, откако било објавено извештајот за движењето на оружјето според меѓународните стандарди за транспарентност.
Според анализите, Осло го удвоил својот придонес тивко, со цел да избегне медиумско внимание и потенцијална геополитичка тензија во чувствителен период на испорака. Овие авиони се очекува да бидат интегрирани во украинскиот систем на противвоздушна одбрана и офанзивни воздушни операции до крајот на годината, особено во услови на зголемени руски напади со дронови, ракети и наведувани бомби.
Дополнително, Норвешка во 2024 година ѝ испорачала на Украина и 20 оклопни возила Dingo 2 отпорни на мини, како и три оклопни инженериски возила NM189. Овој вид помош ја покажува норвешката стратегија за зајакнување на мобилноста и преживувањето на украинските сили, особено во високо ризични зони.
Тивката испорака на напредна опрема се вклопува во поширокиот образец на западни донатори кои дел од својата воена поддршка ја држат под радар – потег што се толкува како начин за намалување на ризикот од ескалација и избегнување на злоупотреба во руската пропаганда. Иако не е меѓу најголемите донатори, Норвешка со континуирана и прецизна помош ја зацврстува западната поддршка за одбраната на Украина.
