Австрија ја потресе еден од најтрагичните настани во поновата историја – вчера во гимназија во Грац беа убиени десет лица, а уште неколку се повредени во вооружен напад кој заврши со самоубиство на напаѓачот.
Според официјалните информации на полицијата, сторителот е 21-годишен маж од околината на Грац и поранешен ученик на училиштето во кое го извршил масакрот, но никогаш не го завршил образованието таму. Нападот е оценет како најсмртоносен во Австрија од Втората светска војна наваму.
Во неговиот дом, истражителите пронашле проштално писмо адресирано до неговите родители, како и нефункционална цевна бомба. Сепак, писмото не понудило јасни одговори за мотивите зад нападот.
Како што соопшти директорот за јавна безбедност во австриското Министерство за внатрешни работи, Франц Руф, истрагата сè уште трае и не е утврдено дали напаѓачот ги избирал жртвите намерно или случајно. Повредени лица се пронајдени на неколку локации низ училиштето, како и едно лице пред зградата.
Напаѓачот користел две легално поседувани оружја – пушка и пиштол.
Во знак на почит кон жртвите, низ Австрија денеска се одржува едноминутно молчење.
