Иако технологијата кај паметните телефони брзо напредува, не сите камери се создадени еднакви. Некои снимаат извонредно при слабо осветлување, други нудат висока резолуција и острина, а трети – едноставно не ја исполнуваат задачата. При купување нов телефон, особено ако камерата ви е приоритет, важно е да знаете што прави разлика помеѓу добра и слаба камера. Во продолжение – седум клучни фактори што влијаат врз квалитетот на мобилната фотографија.
1. Сензор:
Сензорот е срцето на камерата. Тој ги „собира“ светлосните информации и ги претвора во слика. Колку е поголем сензорот, толку повеќе светлина може да апсорбира, што резултира со подобри фотографии – особено при слабо осветлување. Телефоните со мали сензори, како iPhone X (1/3”), се во очигледен хендикеп наспроти модели како Huawei Mate 30 Pro со сензор од 1/1.7”.
2. Големина на пиксели:
Поголемите пиксели можат да „фатат“ повеќе светлина, што значи помалку шум и поквалитетна слика. Се мерат во микрометри (µm) – колку е поголем бројот, толку подобро. Некои телефони, како Huawei P40 Pro, достигнаа 2,4 µm, додека други користат „pixel binning“ техника за да ги комбинираат помалите пиксели и да го подобрат резултатот.
3. Мегапиксели:
Иако често се рекламираат, повеќе мегапиксели не значи автоматски подобри фотографии. Премногу пиксели на мал сензор значат мали пиксели – што не е добро. За секојдневна употреба, 12 до 16 MP се сосема доволни. Моделите со 108 MP честопати и така снимаат во помала резолуција преку здружување пиксели.
4. Отвор на бленда:
Блендата е „отворот“ низ кој светлината влегува во камерата. Означена е со f/ број – колку е тој помал, толку подобро. На пример, f/1.4 значи повеќе светлина во споредба со f/2.4. Поголем отвор овозможува подобро фотографирање во темни услови.
5. Леќи:
Квалитетот на леќите е потценет фактор. Иако во телефоните се користат пластични леќи, важна е нивната изработка. Присуството на брендирани леќи (на пр. Leica, Zeiss) е добар знак, но и телефоните без брендирање (како iPhone или Galaxy) може да понудат извонреден квалитет.
6. Оптичка стабилизација (OIS):
Камерата со OIS (оптичка стабилизација) може да компензира за мали движења на раката, особено корисно при ноќно фотографирање или видео. Без оваа функција, ризикувате заматени слики.
7. RAW формат:
За ентузијастите и професионалците, можноста за снимање во RAW формат значи повеќе детали, бои и простор за уредување. Секако, датотеките се поголеми, но вреди ако сериозно се занимавате со фотографија.
Со познавање на овие седум карактеристики, изборот на мобилен телефон со добра камера ќе биде далеку полесен – и ќе знаете точно што добивате за своите пари.
