Синодот на МПЦ-ОА денеска избира нов митрополит за Дебарско-кичевската епархија
Синодот на Македонската православна црква – Охридска архиепископија (МПЦ-ОА) денеска одржува седница на која треба да биде избран нов митрополит на Дебарско-кичевската епархија, која остана без архиереј по смртта на митрополитот г. Тимотеј во ноември минатата година.
Седницата започнува во 10 часот, а според досегашните информации, единствен кандидат за функцијата е јеромонахот Георгиј, кој неодамна доби црковно унапредување во чин игумен на свеченост одржана во соборниот храм „Свети Климент Охридски“. Произведувањето го изврши архиепископот охридски и македонски г.г. Стефан.
Георгиј, поранешен декан на Богословскиот факултет Ѓоко Ѓорѓевски, се замонаши на 27 мај, следниот ден беше произведен во јероѓакон, а веќе на 29 мај стана јеромонах – исклучително брз напредок во црковната хиерархија.
Гласањето со просто мнозинство – пресуден може да биде гласот на архиепископот
Според Уставот на Црквата, за избор на нов митрополит е потребно просто мнозинство. Синодот брои 12 архиереи, што значи дека за избор се потребни најмалку седум гласа. Доколку гласовите се поделат по принципот „пата-пата“, тогаш решавачки ќе биде гласот на архиепископот г.г. Стефан.
Неофицијално, на седницата не присуствува митрополитот повардарски г. Агатангел поради здравствени причини, а отсутен е и Американско-канадскиот митрополит г. Методиј, кој не пристигнал во земјата. Сепак, и двајцата отсутни владици имаат право да го делегираат своето гласачко право на друг синодски член.
Во изминатата недела во неколку градови, меѓу кои Охрид, Скопје и Кичево, се одржаа мирни собири на верници кои јавно го поддржаа епископот антаниски Партениј за идниот митрополит на епархијата.
Изборот на новиот дебарско-кичевски владика ќе биде значајна одлука за иднината на оваа голема и важна епархија, но и за натамошната поставеност на црковната структура на МПЦ-ОА.
