Македонија

ЕСМ ќе инвестира во складишта за струја – ќе гради батериски системи

Со измените во Законот за енергетика, државната компанија ЕСМ добива обврска да изгради батериски системи за складирање на електрична енергија, со цел да се обезбеди поголема стабилност на електроенергетскиот систем и подобро управување со вишокот струја од обновливи извори.

Согласно новата регулатива, производителите на електрична енергија од фотоволтаици и други обновливи извори ќе мора да обезбедат складишта со капацитет од најмалку 20 отсто од нивната инсталирана моќност.

АД ЕСМ, во координација со МЕПСО и Министерството за енергетика, веќе е во постапка за обезбедување заем од Европската банка за обнова и развој, наменет за проектот „Систем за батериско складирање на електрична енергија“. По завршување на проектната документација, ќе следува јавен повик за избор на изведувач.

Евтината струја ќе се чува, а ќе се продава кога цената е повисока

Со батериските системи, ЕСМ ќе има можност да складира електрична енергија произведена со пониски трошоци во попладневните часови и да ја продава во периоди кога пазарната цена е повисока. Продажбата ќе се одвива преку фирмата ќерка – ЕСМ Продажба.

„Ние како МЕПСО ќе управуваме со системот во делот на балансирањето – ќе интервенираме кога ќе има несогласување помеѓу побарувачката и понудата на струја. Сето останато ќе биде на ЕСМ, која ќе ја продава електричната енергија“, изјави Александар Пауноски, заменик-директор на МЕПСО.

Решение за преоптоварената мрежа

Македонија последниве години бележи нагло зголемување на бројот на фотоволтаични електрани, но електроенергетската мрежа не е доволно подготвена да ја апсорбира сета произведена енергија. Затоа, надлежните институции го гледаат решението во системите за складирање, кои ќе овозможат целосна искористеност на обновливите извори.

Секој инвеститор кој ќе изгради батериски систем – таканаречен „сториџ“, ќе може да учествува на слободниот пазар како оператор на складиште, со можност за купопродажба на струја во периоди на ниска или висока побарувачка.

Енергетската асоцијација веќе предупреди дека неконтролираниот пораст на инсталирана моќност од обновливи извори може да го загрози преносниот систем, и побара законско регулирање на складирањето на електричната енергија.

Поголем интерес, но и повеќе предизвици

Нагласено зголемениот интерес за изградба на нови капацитети доведе до низа предизвици: недоволна мрежна инфраструктура, тешкотии при добивање приклучоци, проблеми со пласманот на струјата и со балансирањето на системот.

Складирањето на енергија, како ново регулирана дејност, веќе е дел од законската рамка. Но, со порастот на инвестициите во батериски системи, се јави потреба за дополнителна прецизност во законските решенија – кои субјекти, во кои услови и на кој начин ќе можат да ги користат складиштата за електрична енергија.

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.

Македонија

Итни мерки против аерозагадувањето активирани и во Скопје

По Кичево и Струмица, од денеска итните мерки за справување со аерозагадувањето се активираат и во Скопје, откако мерните станици регистрираа надминување на дозволените концентрации на штетни честички во повеќе скопски општини. Зголемената магла дополнително ја влошува состојбата, а високи нивоа на загаденост се забележани и во други градови низ државата.

Министерството за животна средина и просторно планирање ги активираше протоколите за заштита на јавното здравје, со посебен фокус на заштита на најранливите категории граѓани.

Согласно владините мерки, работодавците имаат обврска да ги ослободат од работни обврски бремените жени, лицата постари од 60 години, лицата со хронична астма, како и лицата кои прележале миокарден инфаркт или мозочен удар, без разлика на возраста.

Лекарите, особено пулмолозите, апелираат граѓаните да го ограничат престојот на отворено на минимум, доколку нема итна потреба. Според нив, најкритични се раните утрински и доцните вечерни часови, кога концентрациите на загадувачки честички се највисоки. Доколку е неопходно движење, се препорачува користење на јавен превоз наместо сопствени возила.

Надлежните институции ги повикуваат граѓаните редовно да ги следат препораките и официјалните соопштенија сè додека трае епизодата на загаден воздух.