Калифорнија денеска се соочува со администрацијата на Доналд Трамп на федералниот суд во Сан Франциско, откако Белата куќа нареди распоредување на 700 маринци во Лос Анџелес без одобрение од гувернерот. Тензиите ескалираа откако во градот повторно избија масовни, но претежно мирни, протести против имиграциските политики на Трамп.
Според објавата на американската војска, маринците ќе се приклучат на околу 4000 припадници на Националната гарда во заштита на федералните институции и агенти, посебно за време на имиграциските рации. Додека Белата куќа тврди дека не се работи за спроведување на закон туку за „заштита на федералната имот и службеници“, Калифорнија смета дека ова е прекршување на уставните овластувања на државата и бара суд да го забрани нивното делување надвор од федералните згради.
Во исто време, во Вашингтон ќе се одржи воена парада по повод 250 години од основањето на американската армија – на истиот ден кога Трамп го прославува својот 79. роденден. Околу 2000 демонстрации против парадата и распоредувањето на војската се закажани низ целата земја.
Градските власти на Лос Анџелес тврдат дека ситуацијата е под контрола и дека интервенцијата на федералните сили е непотребна и политички мотивирана. Началникот на полицијата Џим Мекдонел изјави дека полицијата го штити правото на протест и интервенира само во случаи на насилство. Неколку изолирани инциденти се забележани, но најголем дел од протестите биле мирни.
Калифорниската тужба се повикува на Законот за Posse Comitatus од 1878 година, кој забранува употреба на сојузни воени сили во цивилно спроведување на законот без одобрение од гувернерот. Претседателот Трамп ја заобиколи оваа регулатива со активирање на федералниот закон Title 10, што му дозволува ограничено ангажирање на војската, но само во исклучителни околности – што Калифорнија го оспорува.
Овој потег е прв од 1960-тите наваму кога е испратена Национална гарда во американски град без дозвола на гувернерот. За многумина, овој чекор претставува загрозување на демократските институции и централизирање на моќта во рацете на федералната извршна власт.
Очекувањата се дека судот денес ќе одлучува за привремена забрана, со што ќе се ограничи движењето и делувањето на војската надвор од федералните објекти додека трае постапката.
